Украинаның Киев қаласында шайбалы хоккейден ерлер арасындағы әлем чемпионатының бірінші дивизионында өнер көрсеткен командалардың ойындары аяқталды.
Соңғы ойындары сенбі күні өткен жарыста Қазақстан құрамасы бірінші орынды жеңіп алды. Осы күні Қазақстан хоккейшілері Киевтің мұз айдынында Украина құрамасымен кездесіп, жалғыз жолдаманың мәселесін шешті. Сөйтіп, 3:2 есебімен біздің пайдамызға шешілген матчта Андрей Хомутовтың жігіттері 2012 жылы Швеция мен Финляндияда өтетін әлем чемпионатының топ-дивизионына берілетін жалқы жолдамаға ие болды.
Жалпы, биылғы чемпионатта командамыз тек мүмкін болған барлық ұпайды жинап, жалғыз жолдаманы жеңіп алу үшін ғана өнер көрсеткенін атап өткен жөн. Ұлттық құрама Киевке келмес бұрын әуелі Словакияда дайындалып, сол жерде осы елдің қомандасымен жолдастық кездесу өткізді. Осы кездесуде Хомутовтың жігіттері алаң иелеріне басымдық танытып, әлем чемпионатына зор құлшыныспен аттанды. Украинаға келгенде ұлттық құраманың қатары тағы бірнеше ойыншылармен толықты. Командамызға Ресейде ойнайтын Виталий Колесник, Дмитрий Уппер мен Максим Семенов қосылды. Біздің құрама алғашқы кездесуін Эстония құрамасына қарсы өткізді. Бұл матчтағы есеп 5:1 болып біздің пайдамызға шешілгенімен, мұз айдынындағы тартыс өте шиеленісті жағдайда өтті.
Келесі кездесуін Қазақстан хоккейшілері Ұлыбритания құрамасымен өткізіп, оны да 2:1 есебімен жеңді. Бірақ бұл жолғы жеңіс ұлттық құрамаға оңайлықпен келмеді. Осы ойынның алдында британдықтар алаң иелерін жеңіп, біршама сенсация туғызған еді. Кейін білсек, Ұлыбритания сапында Канаданың хоккейшілері ойнайтын болып шықты. Дегенмен, Құрлықтық хоккей лигасында шыңдалып, тәжірибе жинақтаған біздің ойыншылар Ұлыбританиямен өткен кездесуде жеңіске жете білді. Британдықтар мұз айдынында оңай шағылатын жаңғақ болмаса да матчтан кейін өткен баспасөз мәслихатында қарсыластардың бас бапкері Қазақстан құрамасының мықтылық танытқанын мойындады.
Қазақстан құрамасы өзінің үшінші ойынын тағы бір Балтық жағалауы еліне қарсы өткізді. Литва командасы біздің жігіттермен кездесу алдында Польшадан 5:1 есебімен ұтылған болатын. Сондықтан Қазақстан құрамасына литвандарды ірі есеппен жеңу қиынға соқпады. Осы кездесуде Андрей Хомутовтың шәкірттері барын салып, «ерінбеген» ойыншылардың бәрі бір-бір шайбаның авторы атанды десе болады. Бұл ойында Талғат Жайлауов пен Евгений Бумагин екі рет, Константин Романов, Роман Старченко және Максим Худяков бір-бірден шайба соқты.
Одан кейін біздің құраманың Польша мен Украина командаларына қарсы өткізген ойындары қызықты және тартысты өтті. Польшамен ойында ұлттық құрама бас бапкеріне қарсыластарын 4:2 есебімен жеңіп, 50 жылдық мерейтойына сый жасады. Матчта Максим Беляев, Роман Савченко, Константин Пушкарев пен Максим Семенов қарсыластар қақпасында шайба тулатты.
Қазақстан құрамасының Украинаға қарсы өткізген соңғы кездесуінде келесі жылы өтетін әлем чемпионатының топ-дивизионына берілетін жалғыз жолдаманың тағдыры шешілгенін жоғарыда айттық. Барлық кезеңдері шиеленісті жағдайда өткен матчтың негізгі уақыты тең болып аяқталды. Қазақстан құрамасы үшін осы тең ойын да жеткілікті еді. Бірақ овертаймда Федор Полищуктің соққан шайбасы Қазақстан құрамасына жеңіс әкелді – 14 ұпай. Ұлыбритания 12 ұпайымен 2-ші, Украина 10 ұпайымен үшінші орынды қанағат тұтты.
Әлем чемпионатының соңында ұлттық құраманың осындай жеңіске деген жігерлігін, жалғыз жолдаманы иеленуге деген зор құлшынысын ескерген жарыстың директораты команданың ойыншысы Роман Савченконы чемпионаттың үздік қорғаушысы атағына лайық деп шешті. Сол сияқты украиналық Олександр Матерухин үздік шабуылшы атанса, британдық Стефан Мерфи үздік қақпашы болып танылды.
Дастан КЕНЖАЛИН.
Суретте: Қазақстан ұлттық құрамасы.