Ғұрыптық рәсімге арналған қола шырағдан жұқа селдір конус тәрізді тіреуіш, жануарлардың мүсіні бар дөңгелек табақ, садақ ұстаған салт аттының мүсіні және түтікшелі тұғырдан тұрады. Қазіргі таңда бұл жәдігердің мекені – елордадағы Ұлттық музей.
Бейнесіне қарай отырып, шырағданның ғұрыптық рәсімге арналғанын байқауға болатындай. Әсіресе жануарлардың мүсіні бар дөңгелек табақта ерекше композициялық бірлік бар. Бастарын сол жаққа бұрып орналастырған он бес бұқа мен қолына садақ ұстап тұрған салт аттының мүсіні көрерменді түрлі ойларға жетелейді. Көпшілік ғалымдар салт аттыны мифологияда кездесетін күн құдайы Митраға теңейді. Ал шырағдан табағы – ол мекен ететін тау. Айта кетейік, жәдігер біздің дәуірімізге дейінгі ІІІ-І ғасырдың еншісіне тиесілі. Осы затпен бірге табылған көптеген тұрмыстық бұйымдар қазіргі Алматының орнында бұрын да үлкен қала болғанын айғақтайды.
Айгүл СЕЙІЛОВА,
«Егемен Қазақстан»
