Инновациялық технологиялар мен роботтехникасын жасау үшін Білім және ғылым министрлігі 2016-2017 оқу жылында мектеп бағдарламасына «Робот техника» элективті курсын енгізгені белгілі. Информатика пәні мұғалімдері осы бағытта біліктілігін арттыру курстарын өтуде. Бұл ауыл балаларына өте қажет. Ертең үлкен қалаларға оқуға барғанда, техникалық білімнен кенже қалып қоймайды.
Аудан орталығындағы Шәкен Айманов атындағы мектеп-интернатта шалғайдағы ауылдардан келген оқушылар білім алады. Мектепте қазақ киносының жарық жұлдызы Ш.Айманов атындағы музей бар. Ұстаздар мен оқушылар Шәкен аталарына тағзым жасап, былтыр кино майталманының туған жері Айманбұлақтағы қыстауға белгітас қойды. Жыл сайын рухани-танымдық Шәкен оқулары өтіп тұрады. Мектептің оқушылары Шәкен аталары сияқты болашақта әнші, актер, кинорежиссер болғысы келеді.
Осындай дарынды жеткіншектер өсіп келе жатқан мектеп-интернатта Робот құрастыруға арналған техникалық кабинеттің ашылуы оқушылар үшін күтпеген қуаныш болды. Облыс орталығындағы мемлекеттік педагогикалық институттың ректоры, химия ғылымдарының докторы, өзі де осы Баянауыл ауылында өскен Алтынбек Нұхұлы оқушылардың әдебиет, өнермен қатар техникаға, ғылымға деген таным-түсініктерін дамыту үшін кабинетті ашуға демеушілік көрсетіпті.
– Роботты техника елімізде енді ғана дамып келеді. Енді міне, ауылдарға жетті, арнайы үйірме ашылып, робот құрастыру ісін бастадық, – дейді мектеп ұстаздары.
Әнуар Жарасбаев есімді оқушы роботты пайдаланып, болашақта ауылға көмектескісі келетінін, ғажайып «андроид» жасағысы келетінін жеткізді.
Робот құрастыруға арналған кабинет ашылған күні-ақ баянауылдық оқушылар өздерінің алғашқы дайындықтарын көрсетті. Информатика пәнін де жақсы меңгергендерін байқатты. Яғни, роботты ұялы телефонмен басқару әдісін және белгілі шеңберден кедергілерді тауып шығару, сондай-ақ синхронды роботтарды билетуді оңай меңгерді. Енді жаңа инновациялық пән балалардың шығармашылық қабілеттерін дамытуды, байланыс әдістерін жетілдіруді, техникалық сауаттылықты қалыптастырады. Жалпы, білім жүйесіндегі негізгі тапсырмалар ақпарат жиынтығы мен әдістемелердің топтамасын меңгеруге, сондай-ақ ойлау технологиясын жетілдіріп, тәжірибе жүзінде қолдануға жол ашады. Облыс орталығындағы мектептерде «Робот техникасы» факультативтік курстары жүргізілуде. Робот техникасы кабинеттерін жабдықтау үшін жергілікті бюджеттен 33,6 миллион теңге бөлінген.
Фарида БЫҚАЙ,
«Егемен Қазақстан»
Павлодар облысы,
Баянауыл ауданы
