Теміржолшылар сенбілікке шықты

«Қазақстан темір жолы» ҰК» АҚ ұжымы дәстүрлі сенбілікке шықты Алтайдан Атырауға дейінгі құс қанаты талатын 14 мың ша­қырымдық магистральды желінің бойындағы теміржол­шы­лар қауы­мы бір атаның баласындай ұйым­дасқан түрде сенбілікке шықты. Ондағы мақсат – қыс бойы қасат қардың астында қалып, күн кө­те­ріле айналаға онша әр бере қой­май­тын күл-қоқыстардан арылу. Астана қаласындағы төрт мыңнан астам, аймақтардағы жол бөлімшелеріндегі ондаған мың теміржолшылар сенбі күні кәсіп­орын аумақтарын тазалады. «ҚТЖ» ҰК» АҚ орталық аппараты қыз­мет­керлері мен филиалдарының қызметкерлері әуежайға шыға­тын жол бойында жұмыс істеді. Астанадағы ауа райының сал­қын­дығына қарамастан темір­жолшылар жол жиегіндегі орман алқаптары мен шөптесін өсім­дік­терді былтырдан бері жиналып қалған жапырақтардан аршыды. Қызметкерлерге арналған «далалық асхана» ыстық шай мен дәмді тағамдарды  жеткізді. Ескендір ЕРТАЙ. Астана.