Сәйкесінше, бағаны тұрақты ұстап тұру шараларына байланысты қадағалау жүргізіп, аппараттық жиында қызыл сөздің қырманын қыздырған баяндамаларды өткір сынға алды.
Осы жиында облыс әкімінің орынбасары Шагурашид Мамалинов жедел және жүйелі сипаттағы шаралар қабылдау жоспарланғанын баяндады. Аймақаралық кооперация аясында мамыр айының ортасында оңтүстіктен жаңа піскен көкөністерден алғашқы «жасыл керуендер» келеді деп күтілуде. Ш.Мамалиновтың айтуынша, апта сайын картоп, қырыққабат, сәбіз, қызылша 5 көліктен келеді. Жаңа піскен көкөністер негізінен әлеуметтік павильондар арасында үлестіріледі.
Ерлан Қошанов облыс орталығындағы және облыстағы басқа қалалардағы супермаркеттерде әлеуметтік сөрелер жасауды тапсырды. Бұл мәселе сауда бизнесінің иелерімен келісіліп жатыр. Мұндай жеке сөрелер сәуір айының соңына дейін пайда болуы керек. Бұдан басқа, Қарағандыдағы 23 әлеуметтік павильон мен коммуналдық базар «Сарыарқа» ӘКК балансына өтпек. Алдағы уақытта әлеуметтік павильондар саны екі есеге артады.
Ауылшаруашылық кооперацияны дамыту – нарықта жергілікті жерде өсірілген көкөністер мен еттің сатылуына қолайлы жағдай туғызбақ. Отандық өнімдерді өткізу үшін Қарағандыда көтерме-тарату орталығын құру қарастырылған. Құрылысты биыл бастап, 2018 жылы бітіру көзделген. Аймақ басшысының айтуынша, ол дүкендерді аралап, бағаларды өз көзімен көрген.
– Қазір көрсетіп отырған бағаларыңыз – жер мен көктей. Өз-өзімізді алдаудың қажеті жоқ. Баяндамаңыз әдемі. Халық бәрін де көріп отыр. Нақты бағаны бақылап отыратын жұмыс тобы құрылды, – деп ескертті әкім орынбасарына.
Дерек бойынша, облыста жергілікті тауар өндірушілер ұн, нан, картоп, қызылша, сиыр мен құс еті, сүт өнімдері және тауық жұмыртқасы бойынша қажеттілікті қамтамасыз етіп отыр. Дегенмен, өзімізде шығарылатын макарон өнімдері, сары май мен ірімшік, көкөністерден – қырыққабат, сәбіз бен пияз жеткіліксіз.
Мирас АСАН,
«Егемен Қазақстан»
Қарағанды облысы
