Дін істері және азаматтық қоғам министрлігі мен Қазақстан жастарының конгресі бірлесіп өткізген шараға вице-министр Абзал Нүкенов, Парламент Мәжілісінің депутаттары Бақтияр Мәкен мен Геннадий Шиповских, республикалық жастар ұйымдарының көшбасшылары, елордалық студенттер қатысты.
Дін істері және азаматтық қоғам министрінің орынбасары Абзал Нүкенов айтып өткендей, биылғы жылдың алғашқы тоқсаны еліміз үшін аса маңызды оқиғаларға толы болды. Жыл басында Елбасының конституциялық реформаларға қатысты Үндеуі жарияланды. Мемлекеттік билік тармақтарының өкілеттіктері қайта қаралып, бірқатар жауапкершіліктер мен өкілеттіктер Үкімет пен Парламентке жүктелді. Жергілікті басқарушы органдардың рөлі күшейді. Еліміз үшінші экономикалық жаңғыру жолына қадам басты. Еліміздің алдағы уақытта әлемнің дамыған отыз елінің қатарына қосылуы үшін рухы бай, мәдениеті жоғары, білімі кемел азаматтық қоғам қалыптастыру керек.
– 12 сәуір күні «Егемен Қазақстан» газетінде Елбасымыздың «Болашаққа бағдар: рухани жаңғыру» атты бағдарламалық мақаласы жарыққа шықты. Бұл біздің еліміз үшін үлкен маңызға ие, құндылығы теңдессіз дүние деп білеміз. Президент мақаласының қоғам үшін қаншалықты маңызды екенін жете түсіну үшін, оның астарына тереңірек үңілу үшін бүгінгі кездесуге жастардың өздері мұрындық болғанына қуаныштымын, – деді Абзал Нүкенов.
Жиын барысында Мәжіліс депутаттары, «Қазақстан жастарының конгресі» заңды тұлғалар бірлестігінің жетекшілері сөз сөй-
леп, Елбасы мақаласының жастарға қатысты бөлімдері туралы өз ойларын ортаға салды.
Дін істері және азаматтық қоғам министрлігінің өкілдері жастармен жұмыс істейтін орган ретінде алдағы уақытта жастар ұйымының қанатын кеңге жаюына, ел игілігі үшін қолға алған жұмыстарына қолдау көрсетуге, жаңа жобалардың жолын ашуға әрдайым әзір екендіктерін айтты.
Арнұр АСҚАР,
«Егемен Қазақстан»
