Елбасының мақаласы туралы зиялы қауым өкілдері өздерінің ой-пікірлерін ортаға салды. Алғашқы болып Қазақстан Жазушылар одағының мүшесі, «Адырна» әдеби журналының бас редакторы Мейірхан Ақдәулетұлы Елбасы мақаласының маңыздылығына тоқталып, онда айтылған мәселелердің елге, халыққа берері көп екенін жеткізді.
– Елбасының бағдарламалық мақаласы – халықтың, қазақтың үлкен, ұлы мәселесі. Сондықтан, бұл мақала санасы сергек, болашақты ойлайтын азаматтардың барлығына өте түсінікті деп ойлаймын. Онда халыққа барлық мәселелер өте нақты айтылған. Елбасы өз мақаласында бүгінге дейін елімізде саяси реформа, экономикалық даму мен өркендеу мәселесі айтылғанын, ендігі уақытта солардың негізгі ұстыны – рух мәселесін көтеру, – деп бастады ол өз әңгімесін.
Дүниеде көптеген ұлт осындай ұстынның жоқтығынан, әркімнің жетегінде кетудің кесірінен, болмаса адами, пенделік адасудан жер бетінен жойылып, тек аттары қалғанын тарихтан білеміз. Не болмаса, олардың бөлшек-бөлшек болып бөлінгенін де білеміз. Бұл бағдарлама біздің халқымызға керек, бұл – рухани дамуымыздың бағдарламасы. Сондықтан, Елбасы айтқандай, рухани мәселелер бәрінен ең бірінші орында тұруы тиіс. Халықтың рухының бүтіндігі, халықтың жоғын тауып беру – мәңгілік мәселе. Міне, осы мәселелерге Елбасы нақты тоқталып, өз мақаласында негізгі проблемаларды айтып, соларды қалай өзгерту керектігін көрсетіп берді, – деді бұдан әрі белгілі қаламгер.
Бұдан кейін Қ.Жұбанов атындағы Ақтөбе өңірлік мемлекеттік университетінің проректоры, тарих ғылымдарының докторы, профессор Рахым Бекназаров Елбасы мақаласында айтылған білім беру, тарих, өлкетану салаларына қатысты өзінің пікірін білдіріп, бүгінгі күні университетте жасалып жатқан жұмыстарға тоқталып өтті. Ол өз ой-пікірін былайша түйіндеді:
– Орта ғасырда өмір сүрген Жүсіп Баласағұн 1069 жылы былай деп жазып кеткен: «Өнер-білім – қос қанаты адамның, осыменен білерсің тілін ғаламның» – деп. Міне, бұл – аксиома. Қазақ дәстүрінде балаға әр кезеңде сапалы білім беруге тырысқан. Еліміздің 25 жылында бұл салада бұған дейін қазақ тарихында мүлдем болмаған күрделі өзгерістер енгізілді. Мемлекеттік білім мекемелерімен қатар, елімізде жекеменшік, шет мемлекеттермен бірлескен оқу орындары ашылды, академиялық-ұтқырлық бағдарламасын жүзеге асыру нәтижесінде алдыңғы қатарлы шет мемлекеттердің оқу орындарында оқуына студенттерге мүмкіндік берілді. «Топ-500»-ге кіретін университеттердің атақты профессорлары дәріс оқып жатыр. «Болашақ» бағдарламасы арқылы бүгінде біздің университеттің өзінде 15 оқытушы магистратура мен докторантурада білімін жетілдіріп келді. Ең бастысы, Елбасы өз мақаласында бүгінгі күні күрделі жүріп жатқан адамзат эволюциясына дер кезінде бейімделе білуіміз керектігін жеткізді. Яғни біздің бүгінгі міндет – жаңа мамандықтарға жас ұрпақты дайындау. Бір мамандықты оқып алып, жайбарақат отыру заманы бітті, замандастар! Қазіргі талап – өмір бойы білім алу, жаңаша өмір сүруге бейімделу, – деп түйіндеді ол өз ойын.
Басқосуда философия ғылымдарының докторы, профессор Амангелді Айталы, Ақтөбе көлік және жаңа технологиялар колледжінің директоры Жеңісгүл Мұхамбетпайызова, М.Оспанов атындағы Батыс Қазақстан мемлекеттік медицина университетінің кафедра жетекшісі, профессор Алтай Тайжанов сөз сөйлеп, жиналғандарға еліміздің рухани тұрғыдан қайта түлеуіне бағытталған Елбасының құнды ұсынысында айтылған бастамаларға үн қосуға шақырды.
Темір ҚҰСАЙЫН,
«Егемен Қазақстан»,
Данагүл ҚАЗИХАН,
журналист
Ақтөбе облысы
