Президент халықпен ойласу ниетімен ортамызға ой тастап отыр. Шығармашылық бағыттағы зиялы қауым өкілдері үшін Елбасымыздың бұл мақаласының маңызы өте зор. Мәні өте күрделі. Тілімізді өркендетейік, дәстүрмен байланысқан дінімізді қадірлейік, қала мен даланың арасын жақындатайық – Нұрсұлтан Әбішұлы ел тізгінін қолына ұстағалы осы әңгімені айтып келеді.
Т.Жүргенов атындағы Ұлттық өнер академиясында 40 шақты студентім бар. Мақала басылған газетті қолдарына ұстатып тұрып: «Үш күн уақыт беремін. Үш күннен кейін әрбір тармағы бойынша талдамалы ойларыңды айтып, маған сынақ тапсырасыңдар», деп тапсырма бердім. Өйткені, мақалада айтылған әрбір ой ең алдымен жастарға керек. Келешек – жастарда. Тілді де, дінді де, ділді де, өнерді де болашаққа жалғайтын жастар. Президент белгілеп берген міндеттердің ішіндегі ең күрделісі тіл болып тұр. Орыс мектебінде оқитын мыңдаған қазақ балалары бар. Латын әліпбиі қазақтарға ғана қатысты болса, онда ол балалардың келешегі қалай болмақ? Екеуін қалай үйлестіреміз? Мақалада осы сияқты өте терең оймен қарауды қажет ететін нәзік тұстар бар. Бұл саясатты іске асыруды қолға алған екенбіз, ендеше, түйінді тұстарын шешуде батылдық танытуымыз керек.
Асанәлі ӘШІМОВ,
КСРО халық артисі, Қазақстан және
КСРО Мемлекеттік сыйлықтарының лауреаты