WBA (Regular) нұсқасы бойынша бірінші ауыр салмақтағы Әлем чемпионы Бейбіт Шүменовтің WBA нұсқасы бойынша уақытша Әлем чемпионы Юниер Дортикосқа қарсы жекпе-жегі қазақстандық былғары қолғап шеберінің жарақатына байланысты өткізілмейтін болды. Бұл туралы Бейбіт Шүменовтің менеджері хабарлаған.
Айта кетейік, бұл жекпе-жек осымен екінші рет тоқтатытылып отыр. Ең алғаш қос боксшы арасындағы кездесу биыл 11 ақпанда өту керек болатын. Алайда, Caribe Promotions компаниясы жекпе-жекті ұйымдастыру құқығынан айырылып, ұйымдастыра алмай қалған. Сонан соң, бұл жекпе-жекті өткізу құқығын Том Браунның TGB Promotions иеленіп, бірінші ауыр салмақтағы WBA нұсқасы бойынша Әлем чемпионы титулына арналған жекпе-жек 30 сәуірге жоспарланған болатын.
Айта кетейік, Шүменов-Дортикос жекпе-жегінің жеңімпазы WBA нұсқасы бойынша «Суперчемпион» ресейлік Денис Лебедевтің міндетті қарсыласы атанар еді.
