Бағытымызды айқындайтын бастама

Жиын барысында театр басшысы Ерлан Біләл ел игілігі үшін жасалып отырған жобаның халыққа ұсынылуымен жиналған қауымды құттықтады.  

– Елбасымыз Н.Ә.Назарбаев­тың «Бо­лашаққа бағдар: рухани жаң­ғы­ру»  атты мазмұны терең мақаласында ай­тыл­ған рухани жаңғыру мен  заманауи ілгерілеудің  жүгенін тартып ұстап, жү­гін қатар көтерісетін азамат тәрбиелей алу мен білімді, жан-жақты ұрпағы бар елдердің  көшбасшысы  болу  қай-қайсымыздың да көкейімізге қонары хақ. Елбасының «Мақсатқа жету үшін біздің санамыз  ісімізден озып жүруі, яғни одан бұрын жаңғырып отыруы тиіс», «Жаңғыру елдің ұлттық –  рухани тамырынан нәр алуы керек» деген  сөздерінің астарында   ел мүддесін басты құндылық деп бағалау жатыр. Ендеше, бұл сүбелі ойды барлығымыз да қолдауға тиіспіз, – деді Ерлан Біләл.

Театрдың белді әртісі Жасұлан Бай­салбеков мақалада айтылған маңыз­ды мәселелерге тоқтала келіп: «Тәуелсіз Қазақстанның  күн сайын қарыштап дамуы жолындағы басты қағидаларының  беріктігі  негізінде Отанымыз түбегейлі жаңғыру мен  жаңа мүмкіндіктерге жол ашуға қабілетті болып отыр. Бар­ша қазақ­стандық жастар Нұрсұлтан Әбішұлының құндылығы зор мақа­ла­сынан  үлкен жігер, болашаққа деген сенім алды. Елбасы «Сынаптай сырғыған уақыт ешкімді күтіп тұрмайды, жаңғыру да тарихтың өзі сияқты жалғаса беретін процесс», деп жастарды заман талабына сай жан-жақты болуға үндеді. Біз артылған үміт пен сенімді ақтауға аянбай еңбек етуге дайынбыз», деді.

– Заманға сай болу, әлемдік сана қағи­даларын қалыптастыру, дамыған ел­дер­мен Отанымыздың терезесі тең тұру­ды басты мақсат еткен Елбасымыз Н.Ә.Назарбаевтың сындарлы саясаты қазақ­стандықтардың мүддесіне бағыт­тал­ған, ұлттық тарих, бүгініміз бен бола­шағы­мыз арасындағы дәнекерлеуші көпір іспетті. Білім саласы, тәрбие, отбасы, әр адамның тұлғалық қалыптасуы, ұлтқа деген шексіз махаббат қашанда жүрегімізде сақталуы керек екені мақала мазмұнынан тыс қалмаған. Атамекен ауылымыздың қадір-қасиетін де ұмытпауға шақырған бастамада ұлттық болмысымызды сақтау мәселесі жан-жақты қамтылуы бәрімізді қуантады, – деді театрдың жас әртістері атынан сөз алған Салтанат Бақаева.

Арман ОКТЯБРЬ,

«Егемен Қазақстан»

АЛМАТЫ