Түркітанушылар бас қосты

Кеше Л.Гумилев атындағы Еуразия ұлттық университетінде «Түркі әлемі: тарих және қазіргі заман» атты халықаралық түркітану симпозиумы өтті. Тәуелсіздігіміздің 20 жыл­дығына орай өткізіліп отыр­ған іс-шараны Білім және ғылым, Мәдениет министрліктері, Лев Гумилев атындағы Еуразия ұлт­тық университеті, Президенттік мәдениет орталығы, Түркі ака­демиясы, Түркия Рес­публикасы үкіметі жанындағы әріптестік және даму жөніндегі Түркия бас­­қармасы ұйым­дас­тырып отыр. Бұл симпозиумды өткізуге – дайындық Еуразия университетінде 2010 жылдың қыркүйек айы­нан басталған болатын. Со­ған орай, университетте түркология кафе­драсының ашыл­ға­нын да айта кеткен жөн. Со­ны­мен қатар, осы сала бойынша бакалавр, магистр және докторанттар даярлау ісіне де мән беріліп отыр еді. Ол ха­лықаралық түрко­ло­гиялық бай­ла­ныстар мен құ­қықтық және ғы­лыми негізде білім берудегі әріп­тестікті дамы­туды көздейді. Екі күнге жоспарланған кон­фе­ренцияның ашылу салта­на­тында университет ректоры Б.Әбдірайым құттықтау сөз сөй­леді. Ол: «Түркология сала ретінде таныла бастағаннан бері, ғылымға көптеген жаңалықтар енгізуде. Елбасының бастама­сы­мен Қазақстанда Түркі ака­де­мия­сы құрылды. Соның нәти­же­сінде түркітанудың өрісі кеңейе түсті. Біздің университетте түркология кафедрасы құрылды. Бұл сала әлем болып, түркі мемлекеттері болып ақылдасатын ғы­лым. Бүгінгі жиынның да халық­аралық тарихи маңызы бар шара екені даусыз», – дей келе, конференция жұмысына сәттілік тіледі. Кең көлемдегі симпозиумды өткізудің мақсаты – түрколо­гия­ның даму өрісі мен өзекті мәсе­ле­лерін талқылау, бірыңғай ақпарат­тық және мәдени кеңістік пен түркі әлемінің қауымдас­ты­ғын құ­ру. Яғни, олар ТҮРКСОЙ, ТүркПА (Парламенттік Ассамблея) сынды өзге де ірі институттармен теңесе отырып, ауқымды әлеуметтік катаклизм мен оқи­ғалар орын алған жағдайда түркі әлемі елдерін интеграциялауға себеп болмақ. Түркітану симпозиумының ал­ғашқы күніндегі пленарлық мә­жілістің соңы Президенттік мә­дениет орталығында өткен кон­цертке ұласты. Жұлдыз БАЙДІЛДА.