Өткен жылғы чемпионаттың жүлдегерлері жанкүйер қауымды аса тартысты және тартымды ойынмен риза етті. Бір қарағанда, екі доп айырмашылығымен алда тұрған және бір ойыншысы артық павлодарлықтар жеңісті енді уыстан шығармайтындай-ақ көрінген. Бірақ алматылықтар алдап соқты. Ұжым 1:3 есебімен ұтылып жатса да, ұнжырғасын түсірмей, он ойыншымен жүріп-ақ есепті теңестіре білді. Бұл ойында «Ертістің» шабуылшысы Аслан Дарабаевтың үш ойыншыны алдап өтіп, алыстан теуіп әдемі гол соққанын айта кеткен жөн. Сөйтіп, бұған дейін турнир кестесінде екінші және үшінші келе жатқан қос клуб маңызды екі ұпайдан жоғалтып, жағдайларын біршама нашарлатып алды.
Өзін өкшелеп келе жатқандар осылайша итжығыс түсіп жатқанда, топ басындағы «Астана» қарқынға қарқын қосып, қара үзіп кетті. Теміржолшылар бұл жолы сырт алаңда «Таразды» ірі есеппен тас-талқан етіп ұтты. Қазір «Астананың» жеке-дара көш бастағаны өз алдына, олардың басқаларға қарағанда бір ойыны кем.
Шымкент барып, жергілікті «Ордабасымен» ойнаған «Тобыл» күтпеген жерден жеңіске жетті. Өз алаңында қандай да болсын қарсыласқа есе жібере қоймайтын оңтүстік футболшылары бұл жолы жанкүйерлерін жерге қаратты. Осы жеңістен кейін қостанайлық ұжым турнир кестесінде «Қайратты» төмен сырғытып, үшінші сатыға көтерілді.
Үздік алтылықтың қатарына ену үшін қызу тартыс жүріп жатыр. Турнир кестесінде көрші тұрған «Ақжайық» пен «Қайсар» арасындағы матчта Орал футболшыларының мерейі үстем болды. Сөйтіп, олар «Қайсармен» арадағы бес ұпай айырмашылығын екіге дейін қысқартып, жетінші орынға табанды нық тіреді.
Сегізінші турда «Ақтөбе» мен «Шахтер» және «Атырау» мен «Оқжетпес» командалары арасындағы ойындар Ақтөбе мен Көкшетаудағы стадиондардың маусымға дайын болмағандығынан кейінге шегерілді.
Сегізінші турдағы ойындар мынадай нәтижелермен аяқталды:
«Ертіс» – «Қайрат» – 3:3 (3:1), Гоу, 5 (0:1). Живкович, 13 – пенальтиден (1:1). Дарабаев, 29 (2:1). Джа Джедже, 40 (3:1). Иличевич, 61 (3:2). Исламхан, 88 (3:3). «Ордабасы» – «Тобыл» – 1:2 (1:0), Ковальчук, 45 (1:0). Жанғылышбай, 64 (1:1). Деспотович, 68 (1:2). «Астана» – «Тараз» - 4:0 (3:0), Граховац, 13 (1:0). Кабананга, 33 (2:0). Жалмұқан, 43 (3:0). Кабананга, 84 (4:0). «Акжайық» – «Қайсар» – 1:0 (0:0), Валиуллин, 56 (1:0).
Сұрмергендер көшін бұрынғыша «Қайраттың» шабуылшысы Жерар Гоу бастап келеді. Оның еншісінде 8 гол бар. Ал екінші орынға биылғы маусымда өзінің 5-ші голын соққан Жуниор Кабананга («Астана») көтерілді.
29 сәуір күні өтетін 9-турда командалар мынадай жұп құрап, өзара тартысқа түседі:
«Оқжетпес» – «Ақтөбе», «Тараз» – «Атырау», «Қайсар» – «Астана», «Қайрат» – «Ақжайық», «Шахтер» – «Ордабасы», «Тобыл» – «Ертіс».
Қайрат ӘБІЛДИНОВ,
«Егемен Қазақстан»
