Өңірде өткен жылы ата-анасының қамқорлығынсыз қалғандар мен жетім балаларды қолдау мақсатында облыстық әкімдіктің ұйытқы болуымен кешенді бағдарлама құрылған. Мұндағы қолдау мен қамқорлық қандай тұрғыда болмақ? Бағдарламаға сәйкес жетім балаларды жебеудің бірнеше жолдары қарастырылған. Әрине, бірінші кезекте тағдыр теперішіне ұшырағандарды тұрақты баспанамен қамту мәселесі тұр. Ең алдымен, олар дәл осы мәселеден қиындық көретіні, қалай шарқ ұрса да оның шешімі мен кілтін таба алмай, бастарын тауға да, тасқа да ұратыны табиғи жайт.
Бұған дейінгі тәжірибе жетім балаларға бюджеттік қаражаттар есебінен үй сатып алып берудің тиімсіздігін көрсетті. Әрі мұндай жолмен панасыздардың бәрін бірдей жарылқау еш мүмкін емес екені де айқын байқалды. Сондықтан бағдарлама жобасы иелері мұндай «мұрадан» саналы түрде бас тартқан. Олар ата-анасының қамқорлығынсыз қалғандар мен жетім балаларды тұрғын үймен қамтудың өзге өркениетті жолын ұсынған.
Бұл осы мақсатты іске асыру үшін оларға Тұрғын үй құрылыс жинақ банкінен есеп-шот ашу болып табылады. Әрине, мұндай есеп-шотты өздері ашуға жетімдердің жағдайы көтермейтіні айтпаса да түсінікті. Сол себепті бағдарлама талаптары мен нормаларына сәйкес бұл сауабы мол іске өңірдегі ірі кәсіпорындарды, акционерлік қоғамдар мен жауапкершілігі шектеулі серіктестіктерді және жергілікті мемлекеттік органдарды бекіту көзделген. Бүгінгі күні алғашқы сомалар жетім балалар үшін ашылған есеп-шоттарға түсе бастады.
Кешенді бағдарламаның екінші тармағы әлеуметтік-патронаттық қолдау қағидаларына арқа сүйейді. Бұл бағытта да ауызды қу шөппен сүртуге еш болмайды. Өйткені, жылжып жатқан іс, көрініп жатқан көмек бар. Айталық аталған бағдарлама қолға алынған уақыттан бері 490 жетім балаға 30 миллион теңгеге жуық көмек көрсетілген. Бұл деректің өзі өңірдегі балалар үйінің түлектері үшін қажетті сома жинақталғанын көрсетеді.
Сондай-ақ, кешенді бағдарламаның келесі үшінші тармағы дімкәс жетім балалардың емделуі үшін қолдау көрсетуді қарастырады. Оны екі түрлі жолмен шешу белгіленген. Яғни мұның біріншісі – арнайы сертификаттар табыстау, екіншісі сол ауру балалардың Тұрғын үй құрылыс жинақ банкінде ашылған есеп-шотына ақша аудару болып отыр. Бұған қосарымыз өңірдегі оқуда озат, өнегелі, зерек жетім балаларға Астанада өткізілетін ЭКСПО-2017 көрмесіне билеттер тегін берілмек. Сертификат демекші, аймақта бір бөлмелі пәтердің сертификатын жетім балаларға табыстау үрдісі де орнығып келеді.
Жетім көрсе жебеп, оларға қара ағаштай пана, бәйтеректей сая бола білудің сауабы өте мол. Осы орайда Ақтөбе облысының әкімі Бердібек Сапарбаев қос бірдей жетім баланы тікелей өзінің қамқорлығына алғаны жүректі елжіретпей, тебірентпей қоймайды. Мұндай биік адамгершілік іс-әрекеттер тек үлкен жүректі азаматтарға ғана тән екені кәміл. Ендеше, осынау бастама өзгелерге де сіңісті болса игі. Біз мұндай шапағаты мол қадамға Ақтөбе облыстық білім басқармасы ұйымдастырған «Мейірімді жүрек» атты қайырымдылық кешінде куә болған едік. Осы шара тақырыбында көрсетілгендей мейірімді жүректің бас иесі өзге емес, өңір басшысының өзі болып шыққаны қандай ғанибет.
Мұндай көңіл толқытар сәтте үндемей қалу, сырт айналу мүмкін бе? Әсте мүмкін емес. Осындай жылы сезім жетегінде өз қамқорлығына алған балаларының қасында жайдары жүзбен отырған облыс басшысына тез адымдап жетіп барып, сізге Алланың ңұры жаусын, Беке, – деп қалғанымызды өзіміз де байқамай қалыппыз.
Қорғай жүр, қайырымдылық!
Темір ҚҰСАЙЫН,
«Егемен Қазақстан»
Ақтөбе облысы
