Бойыңызды шымырлатар шығармалар, жауынгерлер рухын асқақтататын әсем-сазды әуендер, темірдей тәртіпке тәрбиелейтін тәлімді жаттығулар шараның шырайын келтірді. Арнайы концерттік бағдарламада еліміздің еңбек сіңірген қайраткерлері Эльмира Баққали, Мұрат Нұрғазиев, Естай Мұқашев, Еділ Құсайынов, сондай-ақ Ғайни Жұмашева, Асхат Таушев, Бауыржан Тұрғымбаев, Маржан Арапбаева сынды көптеген байқаулардың лауреаттары өнер көрсетті. Ұлттық ұлан ансамблінің фольклорлық тобы, вокалдық ұжымы жиылғандарды әсем сазға бөлеп өз өнерлерін ортаға салды. Концертке Ұлттық ұлан Ән-би ансамблінің басшысы Дархан Рахымғалиев көркемдік жетекшілік жасады.
Шара барысында кеш қонақтары Ұлттық ұланның фототілшісі Вячеслав Гельбингтің ұжымның қызметтік-жауынгерлік тыныс-тіршілігі жайлы фотокөрмесін тамашалады. Осы ретте бір айта кетерлігі, егемен еліміздің Отан қорғаушыларының фотошежіресін жасауда Вячеслав Гельбингтің сіңірген еңбегі ауыз толтырып айтарлықтай. Оның көпшілік фотосуреттері кеш қонақтарының көңілінен шықты. Қазіргі таңда майталман маманның жеке мұрағатында әскери салаға қатысты бір миллионнан аса фотосурет жиылған.
– Жауынгерлік рух тазалық пен жоғары мәдениеттен, ізгілікпен өнерден бастау алады. Сондықтан, бүгінгі шараның мән маңызы зор. Бұл мәдени іс-шара Қазақстан Республикасы Президенті Нұрсұлтан Назарбаевтың «Болашаққа бағдар: рухани жаңғыру» атты еліміздің рухани жаңғыруының бірегей бағдарламасы аясында ұйымдастырылды, – дейді Қазақстан Республикасы Ұлттық ұланының бас қолбасшысы, генерал-лейтенант Руслан Жақсылықов.
Арман ОКТЯБРЬ,
«Егемен Қазақстан»
АЛМАТЫ
