Сары қымыз сапырған қымызханалар

Талдықорған – жасыл желек жамылған әсем қала. Көгілдір көк­темнен оның сән-салтанатын ша­һар­ға кірер тұстан басталатын ақ­шаңқан алты, сегіз қанат ою-өр­нек­пен безендірілген қымызханалар толықтырады. Биыл да солай бол­ды. Бұл бір жағынан ұлттық дәс­түр-салттың жарасымдылығы десек, екіншіден, жаз айларында шөл басып, дертке дауа болатындығы. Жақсы бастаманың одан әрі жал­ғасуын құп көрген облыс әкімі Аңзар Мұсаханов ағымдағы жылы тұтыну­шыға қызмет көрсе­тетін қы­мызхана жұмысын көріп, оның жаб­дықталуы мен ұлттық дастарқан мә­з­іріндегі тағам түрлерінің сапа­лы­лы­ғына мән беру қажеттігін ортаға салды. Осы күні Еңбекшіқазақ, Қара­сай, Жамбыл, Райымбек, Сарқан, Ала­­көл, Іле және тағы басқа аудан­дар­дың қымызханалары мен шұ­бат­­ханаларындағы бай дастарқан келу­ші­лердің талғамынан шықты. Ас атасы – нан, жаңа ғана пісірілген ыстық бауырсақ пен сары қымыз, құрт-ірімшік, жал-жая әр шаңырақ­тан табылды. Үкілі бөрік, зер кәже­кей киген қыз-келіншек­тердің ілти­патымен ұсынылған сусын мен та­ғам дәмі қандай десеңізші! Бәрі де үйлесім тапқан. Бір-бірімен бәсе­ке­ге түскен ақ отау­ларға таңқалыс та­нытып,  талғап, шөл басқандар өз бағаларын беріп жатты. Қымызхана да  табыс көзі болып отыр. Өйткені, шаруа қожа­лық­тары­ның қолымен өндір­ілген қымыз, шұ­бат, жылқы мен қой еттері  ша­һар­лық­тардың талғамынан шыққан­дық­тан, осы жерде құда күту, шілдехана, қыз ұзату, тағы бас­қа ұлты­мыздың салт-дәстүрі жа­расым таба­ты­нын кө­ріп те, куә болып та жүр­міз. Өткен жы­лы қалада – 18, аудан орта­лық­та­ры мен жол бойларында 91 «қы­мыз­хана» жұмыс істеді. Жә­не 978,5 мың литр қымыз бен шұбат сатылған жән­е 400-ге жуық адам жұмыспен қамтылған. Жыл аяғында «Қымызханалар» арасындағы байқау қорытынды­ла­на­тындықтан алты ай жазда бәсе­ке биігінде болуға тырысатындар жұ­мыстарын жүйелей түседі.  Биыл «Қы­мызхана-2011» сауда үй­лері­нің жұмысын ынталан­дыруға 1641 мың теңге бөлініп отыр. Мұның бәрі адам денсаулығын нығайту мен қор­ғауға бағытталған ұтымды шара еке­ні даусыз. Күмісжан БАЙЖАН. Алматы облысы.