Жаяу жорық бағыты – кешегі сынақ аймағы

Биылғы жылдың соңын­да егемен ел атанып, тәуелсіз мемлекетіміздің туын тіктегенімізге 20 жыл толмақ. Осын­дай мерейлі мереке ал­дын­дағы басты оқиға­лар­дың бірі ғана емес, бірегейі еліміздің тұңғыш Президенті Н.Ә.Назарбаевтың алғашқы Жарлықтарының бірімен Семей атом полигонының жабылғанына да 20 жыл толуы болса керек. Ол оқиғаның басты себептері мынада. Яғни, бейбіт заманда 40 жылға созылып, осы өңірдегі қалың елдің қай­ғысына айналған атом аждаһасын ауыздықтау мәселесіне Елбасымыздың ерлігі арқасында кешегі алып империя тарамай жатып нүкте қойылды. Осы айтулы оқиғаға орай кеше Семейде ел газеті «Еге­меннің» дәстүрлі жаяу жорық экспедициясы жолға шықты. Көзі қарақты оқырман аталған басылымның бұл дәстүрлі жаяу жорығы хакім Абайдың 150 жылдық торқалы тойында «Ұлылыққа тағзым» деген атпен бастау алып, кейінде жыр даңғылы Жамбылдың, зама­ны­мыздың ғұлама жазушысы Әуезовтің, ақылдың кеніші Сәтбаевтың, суреткер жазушы Мүсіреповтің, дауылпаз ақын Махамбеттің, ойшыл ақын Шә­кәрімнің және алаш жұр­ты­ның көне астанасы Түр­кіс­тан­ның мерейтойларында өз жалғасын тапқан болатын. Құрамында осы идеяның авторы, «Егемен Қазақстан» га­зетінің ардагері Мамадияр Жа­қып пен осы басылымның Семей өңірі бойынша тілшісі, жаяу жорық экспедициясының тұ­рақ­ты мүшелері Дәулет Сей­сен­ұлы, республикалық Абай қо­рының президенті Балтабек Ерсәлімұлы, сондай-ақ ядролық сынақтарға қарсы «Невада – Семей» халықаралық қозғалы­сы­ның вице- президенті Сұлтан Картоев, «Абыралы – Дегелең» қоғамдық қорының белсенді мүшесі Мақсұт Көшжанов бар бұл топ өз сапарын кешегі сы­нақ аймағының эпицентрі болып табылатын Саржал ауылынан бастап, Абыралы өңіріндегі іргелі Қайнар ауылында аяқ­та­мақ деп күтілуде. Бұдан кейін жаяу жорыққа қатысушылар бұ­рынғы атом полигонының астанасы іспеттес Курчатов қаласында болмақ. Осы сапар барысында оған қатысушылар жолай жергілікті тұрғын­дар­мен жүздесуге де уақыт та­ба­мыз деп отыр. Сапардың негізгі басты мақсаты да кешегі сы­нақ аймағындағы қалың жұрт­шылықтың назарын Елбасы пәрменімен жүзеге асырылған ел өміріндегі басты оқиға­лардың біріне аудару болып табылады. Жаяу жорыққа қатысушы­лар­ды сол күні таңертең қала әкімі Айбек Кәрімов қабыл­да­ды. Осы орайда бас ба­сы­лым­ның ұйытқы болуымен өткізіліп жатқан игілікті шараға облыс әкімі Бердібек Сапарбаев­тың ай­рық­ша көңіл аударып, қам­қор­лық танытып отырғанын айта кет­кеніміз жөн болар. Жаяу жо­рық­қа қатысушылар сапарға аттанар алдында Семейдегі Абай ескерткіші мен ерке Ертіс ай­ры­ғындағы аралдағы полигон құр­бандарына орнатылған «Ажал­дан да күшті» монументіне гүл шоқ­тарын қойды. Мұнан кейін Шәкәрім атын­дағы Семей мемлекеттік университетінде газетіміздің Семей өңірі бойынша тілшісі Дәулет Сейсенұлының Елбасы Жарлы­ғы­мен Семей атом полигонының жа­былғанына 20 жыл толуына орай жақында ғана шыққан «Яд­ролық сынақ аймағы:кеше және бүгін» атты деректі кітабы мен оның құрастыруымен аталған университеттің баспасынан шық­қан хакім Абайдың ұстазы Бай­көкшенің «Тәбәрік» деп аталатын жыр жинағының тұсаукесері өт­кізілді. Оны университет ректо­ры, профессор Ерлан Сыдықов ашып жүргізіп отырды. Екі кі­тап­тың тұсаукесер жиынында қала әкімі Айбек Кәрімов, еңбек ардагері Хафиз Матаев, Курча­тов­тағы Ұлттық ядролық орта­лықтың бас директоры, академик Қайрат Кәдіржанов, «Ұлы­лыққа тағзым» идеясының ав­то­ры Мамадияр Жақып, «Абы­ралы – Дегелең» қоғамдық қорының президенті, полигон туралы кітаптың демеушісі Ма­рат Құрманбай және бас­қалар сөз сөйлеп, полигон қасі­реті мен егемен ел атанғаннан бергі жердегі ел өміріндегі оңды өзгерістер жөнінде кеңі­нен ой толғады. Жиыннан соң Әнет баба атындағы қос мұнаралы орта­лық мешіттің қатымханасында бас басылымның атынан полигон құрбандарының рухына арнап ас берілді. Осыдан кейін жаяу жорыққа қатысушылар кешегі сынақ аймағына атта­нып кетті. Сапар соңында кө­лем­ді есеп жарияланатын болады. «Егемен-ақпарат».