Бангладеш елшісімен кездесті

Кеше Сенат Төрағасының орынбасары Мұхамбет Көпеев Бангладеш Республикасының Қазақстандағы Төтенше және өкілетті елшісі Мұхаммад Имранмен кездесті, деп хабарлады Сенаттың баспасөз қызметі. М.Көпеев М.Имранды елші лауазымына тағайындалуымен құт­тықтады және оған еліміздегі дипломатиялық қызметін табыс­ты атқаруына тілектестігін білдірді. «Қазақстан Бангладешпен тең құқықты әріптестіктің барлық бағыттары бойынша өзара тиімді ынтымақтастықты, оның ішінде парламентаралық деңгейдегі үн­қа­тысуды дамытуға әзір», – деді Төраға орынбасары.  М.Көпеев атап өткендей, «біздің еліміз Азия мемлекеттерімен достық бай­ла­ныс­тарды нығайтуға және өзара жан-жақты іс-қимылға зор мән береді». Кездесу барысында халық­аралық ұйымдар аясындағы ын­ты­мақтастықты дамыту мәселе­лері талқыланды. М.Көпеев Банг­­ладештің Ислам Конференциясы Ұйымына белсенді түрде қаты­сып келе жатқанын жоғары баға­лады және ИКҰ-ға мүше елдер Сыртқы істер министрлері кеңе­сінің 38-отырысын биылғы 28-30 маусымда Астанада өткізу туралы қазақстандық бастаманы қолда­ғаны үшін Бангладеш бас­шылы­ғына ризашылығын білдірді. Төраға орынбасары, сондай-ақ Азиядағы өзара іс-қимыл және сенім шаралары жөніндегі кеңес қызметін дамытуға Бангладеш жағының қатысқанын атап өтті. Бангладештің бұл форумда бай­қаушы мәртебесі бар. Кездесу ба­рысында тараптар сауда-эконо­микалық байла­ныс­тарды дамыту жайында айтты және екі елдің рыноктарын, өзара тиімді ынты­мақ­тас­ты­ғы­ның келешегі зор ба­ғыттарын зерделеу қажеттігін атап өтті.  М.Имранның айтуынша, Қа­зақстанда да, Бангладеште де саяси және экономикалық бай­ла­ныс­тарды дамытуға зор мүмкіндіктер бар. Екіжақты қатынастарды ны­ғайтудағы парламенттердің рөл­дерін атап өте келіп, дипломат ынтымақтастықтың парламенттік топтарын құруды жақтайтынын білдірді.