Аталған елде алты жылдан астам уақыттан бері жалғасып жатқан соғыстың ықпалы сезілмеген аймақ жоқ деуге болады. Ұзаққа созылған қақтығыс Таяу Шығыстың ғана емес, бүкіл әлемнің бас ауруына айналды. Сол үшін де әлемдік қоғамдастық бейбітшіліктің орнауына күш-жігерін жұмсауда. Сирия мәселесіне қатысы бар сыртқы және ішкі күштердің барлығы Астана процесінің жалғасуына мүдделі екендіктерін көрсетті. Төртінші раундқа тараптардың барлығының келгені осының бір көрінісі.
Әрине, қарулы оппозиция топтарының келіссөздердің төртінші раундына келуіне қол жеткізу оңай емес. Яғни, мұны қазақстандық дипломатияның ғана емес, барлық тараптардың маңызды жетістігі деп бағалаған жөн.
Әрине, жағдай әлі де күрделі, оны осы раундта шешіп тастау мүмкін емес. Дегенмен, тараптардың барлығының бір үстел басынан табылғаны, осы форматқа барлығының келіскені процестің алдағы уақытта ілгерілеуіне мықты негіз болды, ол болашақта ахуалдың бейбіт жағдайда шешілуіне алып келуі мүмкін.
Әділ КАУКЕНОВ,
саясаттанушы
