Жастар – ел ертеңі

Өңірдегі білімнің қара шаңырағы І. Жансүгіров атындағы Жетісу мемлекеттік университетінде Тәуелсіз­ді­гіміздің 20 жылдығына арналған мерекелік шаралар жүйелі өткізіліп, студенттер белсенділігі артуда. Оқу жылының ба­сында «Тәуелсіздік – тағдырым» атты кешенді бағдарлама жасалып, жастарға тағылымды тәрбие беретін шараларға баса мән берілді. Ақпан айында білімгерлер арасында «Тәуелсіздік – ел мерейі» атты жас ақ­ындар мүшәйрасы ұйымдас­ты­рыл­ды. Екі кезеңнен тұрған мүшәйраға 15 үміткер қатысып, Отанға, туған елге, жерге деген сезімдерін жыр шу­мақ­тарымен өрнектеді. Нәтижесінде жүз­ден жүйрік атанған Назгүл Ақба­сова бірінші, Қайым Бақытұлы екінші, Жансая Тұрғамбекова үшінші орынды иеленген еді. Біздің әлеуметтік-экономикалық да­му жолындағы қарқынымыз, жастар­дың қоғамдық-саяси өмірдегі ұстаны­мына, олардың ертеңгі күнге деген сенімі мен белсенділігіне тікелей бай­ланысты. Осы мақсатта «Менің Қа­зақ­­станым: кеше, бүгін, ертең» атты ха­лықаралық ғы­лы­ми-практикалық кон­ференция өт­кі­зілді. Жастарға тәу­ел­сіздіктің бағасын, қа­дірін ұғындыру мақ­сатында уни­верси­тет­тің оқытушы-про­­фессорлары білімгер­лерді «Тәуелсіз Қа­зақ­станның қа­лып­та­суы мен дамуы» ат­ты дөңгелек үс­тел басындағы сұх­батқа шақырды. Ба­яндамашылар Қа­зақ­стан­ның 20 жылда қол жеткізген та­быс­тарын, өркениетті елдер қатарына қо­сылудағы Елбасы Н.Назарбаевтың қос­­­қан үлесі жайында жан-жақты ба­яндады. Университетте қыздар тәрбиесіне мән беру мақсатында «Қыз – қы­лы­ғы­мен» клубының ұйымдасты­руы­мен «Тәу­елсіздікке – тағзым» атты кездесу өтті. Кездесуге Желтоқсан оқи­­ға­сына қатысушылар, қоғам қай­раткер­лері мен ғалымдар қатысып, азаттық күнге жету үшін жүгі нарда, қазаны теңде, аяғы үзеңгіде болған ата-ба­бамыз тозақтың өзін, тағдыр­дың тезін көргендігін студент жас­тарға жеткізіп, тәуелсіз тір­лі­гіміздің баянды бо­луын тіледі, оған үлес қо­суға ша­қырды. –––––––––––––– Суретте: ерекше белсенділігімен та­ныл­ған студенттерді марапаттау сәті.