Елімізге ерекше сенім белгісі

...Еліміз тәуелсіздік алған тұс­тың алғашқы өтпелі кезеңінде Меккеге қажылық сапар өтеуге барғанымда, мені сондағы арабтар Пәкстан, Ауғанстан, тіпті Қытай азаматтарымен шатыстыр­ған еді. Мұндай жағдай сыртқа шыққан әрбір қазақтың жүрегін талай сыздатқан болар?! Аллаға тәубе, бүгінгі таңның қажылы­ғында Қазақстан десең, Нұрсұл­тан деп жауап беретін жағдайға жеттік. Сонау 11 қыркүйектегі әйгілі теракт жаһандағы қай елдің болсын жүрегіне үрей тудырды. АҚШ әлі де ұмытпайтындай әсер­де. Бұл дүниені екіге бөлген «Ислам қатері» теріс дақпен ақ пейілді мұсылманға жағылды. Бүгінде Батыс елдері ішкі үре­йін білдірмесе де, қырағы көзі­мен жан-жақтағы ынтымағы жарас­қан мұсылмандарға жал­тақ­тап қарайтындай. Ал кейбір ислам елдерінің өз ішінде ауыз­­бір­ліктің сақтал­май отырғаны рас. Егер де мақ­сатымыз бір арнаға тоғыспаса, өз арамыз бүлікке ай­на­лып кетуі де ықтимал. Сон­дық­тан, Алла таға­ланың хақты­ғына сенуші елдер бір жағадан бас, бір жеңнен қол шығарып, үлкен күнәлардан сақ­танып, әлем тарихының бетін кірлетпеуі керек. Негізінде, ислам – жоғары мә­дениет пен өркениет діні. Небір Батыстың ұлы ғұлама-ғалым­дары мен философтары ислам дінімен тәубеге келген. Тіпті дү­ние­жүзілік өркениет мұсылман үлесінсіз дамыды дегенге сенуге болмайды. Қайта исламнан бастау алған десек жарасады. Ислам – жақсылыққа шақыратын дін. Оны барша әлем мойындайды. Ұлы француз океанологы Жак Ив Кусто мұхит әлемінің құпия сырын ашуға бар ғұмырын сарп еткен. Бір атап көрсетерлігі, өмірінің аз уақыты қалғанда сол сырды қасиетті Құран аятынан оқып, Аллаға мойынсұнып, ис­лам­ды қабылдап өткені көп нәр­сені аңғартатыны анық. Ал, бүгінде дінімізге «ислам терроризмі», «лаңкестік», «діни экстремизм» атауларымен таңба салынуда. Ислам бейбіт дін екенін ұмытпауымыз керек. Бүгінде Исламның шарық­тау кезеңі тұсында ислам әлемі ойын сан-саққа жү­гір­тіп, жаңа әлемнен өзіне жаңа орын іздегенімен, ал­ғаш­қы қадамы­нда түсіністік пен келісім болуы керек, бір тілмен айтқанда, бастысы – толе­рант­ты­лық­пен өзара әрекет жасау. Президент Нұрсұлтан Назар­баев­тың: «Құдай қаласа, ендігі жылы Ислам Конференциясы Ұйы­мына басшы боламыз. Бүкіл дүниедегі ислам мемлекеттерін аралап, олармен де кездесіп, олар­дың да басын қосуға мүмкіншілік жасайық. Осындай жағдайды қа­зақтың басына, біздің еліміздің басына беріп отыр. Батысты да, Шығысты да қосып, ел-жұрттың арасын табыстыруға ұмтыла­йық» немесе «Мұсылман әлемі­мен қатынасты жандандыру – Қазақстанның сыртқы саясаты­ның басым міндеттерінің бірі!» деген сөздеріне елең етпеген жан қалмаған шығар. Яғни, жаһан мұсылмандары­на көшбасшы болу – жан-жақты мықтылану деген сөз. Басқа мұ­сылман елдерімен қарым-қаты­на­сымыз жақсы. Бұл – өте қым­бат деңгей. Мақсатымыз – қолдау мен дамыту. Жұмыр жердің бетінде 200-ден астам мемлекет бар. Оның 60-қа жуығы ислам дінін ұстанады. Яғни, әлем мұсыл­мандарының бүгіні мен ертеңг­і тағдырының келелі мәселелеріне еліміздің киелі шаңырағында «Ақыл­мен, ашық, әділ түрде үн­қатысу шеңберінде пәтуа» шыға­ру­ға берілген алғаш мүм­кін­шілік, Алла та­ға­ланың бізге жазмышы. Сенімді талап ететін сынды ауыр жүк. Дегенмен, ескеретін жағ­дай­лар бар. Мысалы, экономикалық тұрғыдан келер болсақ, та­биғи ресурс­тар­дан мұнай қорының 70 па­йызы мен та­би­ғи газдың 50 пайызы Ислам Кон­ференциясы Ұйымының мүшелі­гін­дегі елдердің еншісінде екен. Бұл, әрине, әлемдік байлықтың жақсы деңгейі. Тек осал жерлерімізді алға бастыру қажеттілігін ойластырған жөн. Негізінде ислам әлемі мен оның дамуы дүниежүзілік деңгейде жоғары көрсеткіште емес екендігін мо­йын­дауымыз қажет. Әлеуметтік жағынан мұсылман отбасының өмір сүру сапасы мен табысы, бала мен ана өлімі, жұмыс­сыз­дық, мұсылман құқығы тәрізді мәселелер мәз емес. Ал рухани мәдениеті жағынан Еуропа елдерімен салыстырғанда даму бар. Дегенмен, діни надандық пен діни сауатсыздық көріністері де жоқ емес. Ең негізгісі – ислам дінін жамылған тексіз діни ағымдар мен топтар көбейіп, әр түрлі қозғалыстар мен партиялар құрылып, ислам құндылық­та­рын таптауда. Бұған да­мы­ған Батыс елдерінің алакөз­де­ніп сенімсіздік танытуын қосы­ңыз. Байқағанға, бұл жағдайлар біз­дің өз арамыздағы жастарға елік­­­теу туғызуда. Сондықтан қа­лыптас­қан жағдайлар бұ­дан да кең ау­қым алмауы үшін оған тос­қауыл қою жақтарын қарас­тыру қажет. Дүние жүзінің саясаткерлері, сарапшылары Шығыс пен Батыс мәдениетін ғасырлап талқыға салып келеді. Бірақ, осы екеуінің өзара тиімді қатар өмір сүру формуласын тапқан емес. Елбасы Н.Назарбаевтың «Еуропаға жол» бағдарламасы қабылданғаны белгілі. Бұл – ертеңгі күні жемісін берер үлкен дүние. Яғни, Еуропа мен Ислам әлемі Қазақстанның қос қанаты іспетті болмақ. Өр­кениеттер үнқатысуына рухани тиімді тәсілмен ислам ынтымақ­тас­тығының жаңа архитектурасынан үмітіміз бар. Алайда, Ислам Конференция­сы Ұйымы діни бағыттағы ха­лық­аралық ұйым емес, үкімет­ара­лық ұйым. Яғни, ислам ын­ты­мақтастығын басшылыққа алып, отаршылдыққа, гендерлік теңсіз­дікке, нәсілшілдікке қарсы бірігіп күресуді қарастыратын әлеу­меттік, экономикалық және саяси бағыттағы жан-жақты құрылым. Басты мақсаты, әсіресе, дүниенің шиеленісу аймақтарында мұсыл­мандық ынтымақтастықты кү­шей­ту мен дамыту болса, ұс­танымы – экономикалық мүмкін­діктерін өзара әріптес елдер арасында дұрыс пайдалану. Ең ұнамдысы – шариғат қағидасын басшылыққа алатын бейбітшіл, келешегі зор ұйым. Ұйым құрамына енуді әлем­нің көптеген елдері қалайды. Көрші Ресей қоғам мүддесі үшін Ұйыммен байланыс жасағанды жөн көреді. Төрткүл дүниеге бұрылмастан тең қарау үшін төрт көзің болуы тиіс. Сол іспеттес, ұйымға Қазақ елі 1995 жылы мүше болса, оның қызметінің өр­леуіне өзіндік жаңару ұсыныс­тарын енгізіп келеді. Ислам Конференциясы Ұйы­мы бізді Орталық Азиядағы бейбіт ел, тату орда, салиқалы сая­сатымен беделі биік, ынтымақты дәріптейтін саламатты ел, ұлт пен дін келісімі жарасқан озық мемлекет ретінде танып біледі. Шүкір, дүние жүзіндегі БҰҰ-дан кейінгі ірі ұйыммен алғаш рет төс қағыстырып, қол алысып, бір сапта қатар тұрып, оған төраға­лық еткелі отырмыз. Бұл төрағалық бізге не береді дегенге келсек, дүние өздігінен пайда бола қалмаған, сол сияқты ертеңгі еліміздің төрінде тұсауын кесетін саяси және экономика­лық келісімдер – жарқын келешегіміз. Біз сан ғасырдан бері мұсылман елміз және ислам өркениетінің бір бөлігіміз. Бірақ әлемдегі мұсылман қауымымен енді етене араласып жатырмыз. Соған қарамастан, төрағалықтың сеніп тапсырылуы еліміз беделі­нің қазірдің өзінде айтарлықтай көтерілгенін көрсетеді. Қазіргі әлемдік алаңда Сол­түс­тік Африка мен Таяу Шығыс­тағы дүрбе­лең, Израиль-Палестина мәселе­сі мен Иранның «Ядролық бағдар­ламасы» көптің көңіліне түйткіл болып отыр. Елімізге шоғыр­ла­натын мұсыл­ман ел­дері­ өкілдерінің түпкі ойы алдағы күн­дерде белгілі болады, дегенмен, дүниеде қабақ шытыс­қан­дар­дың қазанын са­пырмай, жал­пы­ның көңіліне қонатын бас­­тамалары­мызбен мә­­мі­леге ша­­қы­рып, билігімізбен ортақ құжат жасауы­мызда Жа­рат­қан Алла Елбасы­мызға және ел қамында жүрген аға-інілері­міз бен апа-қарын­дастарымызға қуат берсін деп тілейік. Нұрлан қажы АСАНОВ, Қазақстан мұсыл­ман­дары діни басқар­ма­сы­ның Өскемен ай­мақтық өкіл имамы.  Шығыс Қазақстан облысы.