Кедендік одақ мүшелері келелі кеңес өткізді

Алматыда Кедендік одаққа мүше мемлекеттердің кедендік қызмет жетекшілері қатысқан жиын болып өтті. Онда Қазақстан, Ресей және Беларусь мемлекеттері кедендік қызметі басшылары бүгінгі күн тәртібінде тұрған басты мәселе – біртұтас кедендік ережелерді қолдану төңірегінде ой бөлісті. Жиында, сонымен қатар, Кедендік одаққа мүше мемлекеттердің кедендік қызметі заңнамасын одан әрі жетілдіру бағытындағы мәселелер де кеңінен талқыланды. Көпшілікке белгілі, Кедендік одақ елдері – Ресей, Беларусь және Қазақстан  өткен 2010 жыл­дың 1 шілдесінен бастап бір­тұтас кедендік аймақ құрып, интеграцияның, яғни ықпал­да­су­дың алғашқы кезеңіне енген болатын. Ал тура бір жыл бұ­рын Кедендік кодекс өз күшіне еніп, Кедендік одақ қалып­та­суы­ның алғашқы кезеңінен де өтті. Сөз реті келгенде атап айтар­лы­ғы, келер жылдың, анығырақ айт­қанда, 2012 жылдың 1 қаң­тарында Біртұтас эконо­ми­ка­лық кеңістік құру жоспарланып отыр. Бір құптарлығы, интегра­ция­лық процестерге Еуропада бір­неше онжылдықтар жұмсал­са, ТМД елдері бұл іс-шара­ларды мүмкіндігінше қысқа мерзімде жүзеге асыруда. Тағы бір атап өтетін жәйт, мүше мемлекеттер арасында ішкі ше­караның болмауы бизнестің, кәсіпкер­ле­р­д­ің жұмысын жеңіл­детуге едәуір ықпал етпек. Сонымен қатар, мұның тауарлар мен капиталдың қозғалысына да көмегі мол, яғни мүше мемлекеттер алдында қо­сымша ауқымды мүмкіндік­тер­ге жол ашады. Кедендік одақтың 1 шіл­деден бастап өз дамуының жаңа саты­сына көтеріліп, Ресей-Қазақстан шекарасында кедендік бекеттер­дің жойылуының өзі көп нәр­седен хабар берсе керек. Қаржы министрлігі Кедендік бақылау комитетінің төрағасы Серік Бай­мағанбетовтің айтуын­ша, «Ке­дендік одаққа мүше  мемлекет­тердің барлығына ар­нал­­ған кедендік баж салығы, қо­сымша құн салығы және ак­циз­дер жалпыға ортақ болмақ. Ол сондай-ақ «қазіргі кезеңде Ке­дендік одақтың жұмыс істеуіне арналған барлық қажетті жағ­дай дайындалып, құқықтық құ­жат­тар да қабылданғанын» ха­бар­лады. Мұның барлығы кедендік әкімшілік іс-шараларының тиімділігін арттыруға ықпал ете­тіндігі сөзсіз. Кедендік қызмет басшылары жұмыс сапары аясын­да Алматы және Алматы облысы департаментінің «Қор­ғас» кеден бекетінде болып, оның жұмы­сымен танысты. Соны­мен қатар, контрабандамен, қылмыспен кү­ресті күшейту бағытындағы мә­селелер де назардан тыс қалған жоқ. Ресей Федералдық кеден қыз­метінің жетекшісі Андрей Бе­льяниновтің пікірінше, «Қорғас» кеден бекетінің қызметі талап деңгейінде. «Шекара учаскесінде алғаш рет болуыма қарамастан, бұл бекеттің жұмысын ойда­ғыдай деп бағалауымның өзіндік себебі де жоқ емес. Өйткені, мұн­дағы жұмыс жүйелі түрде жүргізілуде. Біздер бұл кездесуде ақпараттық алмасуды жетілдіру мәселелерімен қатар, бірың­ғай әдістерді жүзеге асырудың жолдары туралы да пікірлестік», деді Андрей Бельянинов өз ойын ортаға салып. Сонымен, Кедендік одаққа мүше мем­лекеттердің кедендік қызметі Кедендік одақ заңнамасын сақтай отырып, жұмыс сапасы мен тиім­ділігін арттырмақ. Бақыт БАЛҒАРИНА. Алматы.