Түлеп ұшқан түлектер

Еңселі елордамыздың мектептерін биыл 3650 түлек бітіріп шықты. Олардың арасынан 99 оқушы «Алтын белгіге» лайық­тығын дәлелдесе, 64 түлек ерекше аттестатқа ие болды. Ал 125 түлек халықаралық және рес­пуб­ликалық байқаулардың же­ңімпазы ретінде танылып, олар қа­зір­дің өзінде мемлекеттік грант­қа қол жеткізіп отыр. Осындай биік белестен көрінген елордалық оқушылардың арасынан шыққан жүзден жүйріктерге арналған сал­танатты рәсім «Қазақстан» орта­лық концерт залында өтіп, қала әкімі Иманғали Тасмағамбетов мектеп бітіруші ұл-қызға сәт сапар тіледі. Он бір жыл бойы білім нәрі­мен сусындатқан алтын ұялары­мен қоштасу оңай емес. Десе де, алдарыңызда өмірдің даңғыл да, дара жолы жатыр. Бүгін жас астаналықтардың жаңа толқыны өздерінің алғашқы ең маңызды білім туралы құжаттарын алып отыр. Осы оқиғамен сіздерді шын жүректен құттықтаймын! Еліміз Тәуелсіздігінің 20 жыл­дығы қарсаңында бұл ерекше мазмұнға ие, деген Иманғали Нұрғалиұлы Нельсон Манде­ланың «Мен – өз тағдырымның әміршісімін. Мен – өз арманым­ның капитанымын» деген сөзін дәйекке келтірді. «Ол кісі көзі тірісінде ұлы тұлғаға айналды. Өйткені, ол өз арманын тауып, оны гуманистік жолмен жүзеге асырды. Арманына әр адамға түсі­нікті идеалистік құралдардың көмегімен қол жеткізді. Сондық­тан сіздерге ешқашан армандары­ңыздан бас тартпаңыздар дегім келеді. Әркімнің өз арманы бар. Тек арман ғана сіздерді табысқа жетелейді», – деді ол. Бұдан кейін  биыл үздік көр­сет­кішке жеткендерді марапаттау рәсімдері жалғасын тапты. «Ана тілі жұлдызы» номинациясы бо­йынша ер балаларға арналған қазақ-түрік лицейінің түлегі Әбікен Әміре, «Шабыт жұл­ды­зы» номинациясы бойынша №60 мектеп-лицейдің түлегі Әйгерім Оспанова, «Көшбасшы жұлды­зы» номинациясы бойынша №38 мектеп-лицейдің түлегі Ысқақ Әсет, тағы басқалар бағалы сыйлықтарға ие болды. Мектеп түлектерінің атынан Айдын Аханов жауапты сөз алып, өздеріне жасалып отырған ілти­пат­қа ризашылығын білдірсе, қа­зақ­тың айтулы әнші қызы, Қазақ­станның халық әртісі Роза Рым­баева «Мектеп вальсін» орындады. Сүлеймен МӘМЕТ