ЖЕТІСУ ЖЕРІН ДУМАНҒА БӨЛЕДІ
Ел тәуелсіздігінің 20 жылдығы аясында өткізіліп жатқан мәдени көпшілік шаралар легі барған сайын жарқын сипат алып, ауыл-аймақтағы жұртшылықты қуанышқа кенелте бастады. Соның айғағындай, республикалық ақындар айтысы Ұзынағаш ауылында өтіп, оны көпшілік ерекше ықылас қойып тамашалады. Бұл жыр бәсекесі сондай-ақ халық поэзиясының алыбы Жамбылдың туғанына 165 жыл толуы құрметіне орай ұйымдастырылғанын да атап айтқан орынды.
Еліміздің бірнеше облыстары мен қалаларынан келген өнер саңлақтары өзара бәсекеде сөз сайысының дәстүрлі үлгісінен жаңылмады. Қыз бен жігіт, жезде мен балдыз, жеңге мен қайны, ұстаз бен шәкірт, құрдастар арасындағы астарлы әзіл, тапқыр тармақтар арқылы бір-бірін бірде тұқыртып, бірде құлпыртып сөйлеген ақындар айтыстың ажарын аша түсті.
Нәтижесінде, ынталандыру сыйлығына Атырау облысынан келген Серік Қойшығұлов пен Нұрболат Нұғыманов, Жамбыл облысының намысын қорғаған Есет Досалы, алматылық Рүстем Қайыртай мен Айсәуле Бейсехан, шымкенттік Кәрима Оралова, Алматы облысынан Қуаныш Жанәділ, Әбдіғани Бәзілхан, Айбек Ережеп сынды үш ақын ие болды.
Сөз шеберлерінің бір тобына атақты ақындар атындағы арнайы жүлделер тағайындалды. Мәселен, Доспамбет жырау атындағы сыйлық семейлік Ринат Заитовқа, Оразалы Досбосынов атындағы жүлде Алматы облысынан келген Бақыт Жағыпарға, Қазақстанның халық ақыны Әсімхан Қосбасаров атындағы жүлде Қызылорда облысынан келген Мұхтар Ниязовқа, балқаштық дүлдүл ақын Балтағұл Бигелдиев атындағы жүлде Шығыс Қазақстан облысынан келген Әсем Ережеқызына, Алатаудың бұлбұлы атанған даңқты композитор әрі ақын Кенен Әзірбаев атындағы жүлде Ақтөбе қаласынан келген Төреғали Әлиханға, ақын Темірғали Рүстембеков атындағы жүлде Қарағанды облысынан келген Мақсат Ақановқа, Жандарбек Бегімбетов атындағы жүлде Алматы қаласының атынан айтысқан Серік Қалиевке бұйырды.
Ақтық сынға алты ақын жолдама алды. Олар – астаналық Серікзат Дүйсенғазин, Алматы облысының жас арғымақ айтыскері Жандарбек Бұлғақов, Орал қаласының жүйрігі Жансая Мусина, Қарағанды облысынан қара үзіп шыққан ерен дүлдүл Дидар Қамиев, Астана қаласының ақтаңгер ақыны Айнұр Тұрсынбаева, Батыс Қазақстан облысынан келген Бауыржан Халиолла.
Іріктеу айтыстың қорытындысында қазылар алқасының төрағасы Өмірзақ Айтбайұлы түйінді сөз сөйлеп, тапқырлық пен ой ұшқырлығының озық үлгісін көрсеткен дарын иелеріне шығармашылық сәттілік тіледі.
Айтыс Сарыжазық жайлауында өткен малшылар слетінде нағыз ұлттық дәстүрімізге сай ұйымдастырылған түрлі ат спорты шараларымен бірге жалғасты.
Қазылар алқасының бағалауымен ақын Сара атындағы ІІІ дәрежелі дипломға Айнұр Тұрсынбаева, Үмбетәлі Кәрібаев атындағы осындай жүлдеге Бауыржан Халиолла, Бақтыбай Жолбарысұлы атындағы ІІ дәрежелі диплом Жандарбек Бұлғақовқа, Қаблиса жырау атындағы осындай жүлде Жансая Мусинаға бұйырды.
Ақиық ақын Сүйінбай Аронұлы атындағы І дәрежелі диплом Дидар Қамиевке берілді. Ал Жамбыл атындағы бас жүлдені Серікзат Дүйсенғазин иеленді.
Жайлау төріндегі Жамбыл ауданының малшылар жиынында «Сазген» фольклорлық-этнографиялық ансамблі өнер көрсетсе, шаршы кілемдегі балалардан бастап, білекті жігіттердің белдесуіне көпшілік қауым ерекше қошемет танытты. Облыс көкпаршылары серкені қолдан бермесе, қыз қуу ойыны да қызықты болды.
Тау мен тасты, өр мен ылдиды талғамайтын шабандоздар да ерекшеленіп, бес жүйрік бәйгелі болды. Бас жүлде айдарлылық шабандозға, екінші орын Беріктас, үшінші орынды Талап ауылының сәйгүліктері иеленді.
Бап та, бақ та бәсекеге түскен айтыс пен ұлттық ойын өрнегі осылай қабысқан тамашаның көрермен көңілінен шыққаны анық.
Күмісжан БАЙЖАН.
Алматы облысы.
Суреттерде: Сарыжазықтағы мерекеден көріністер.
