Жаңа тұрғын үйлер алабында болды

Кеше Елбасы Нұрсұлтан Назарбаев Астанадағы «Гранд Астана» тұрғын үй кешені мен сол жағалаудағы «BI Village» коттеджді тұрғын үйлер алабын аралады. Түске дейін қара бұлт түйіліп, жаңбыр себезгілеп тұрған Астана аспаны Елбасы қалаға шық­қан­да шайдай ашылып, жарқы­рап сала берді. Президент проб­ле­малық нысандардың құрылы­сы­мен және «АҚҚБ «Жаңа құ­рылыс» ЖШС үлескерлерді тұр­ғын үйлермен қамту барысымен танысты. Елба­сы «Қуат» құ­ры­лыс корпорациясы бастап салған үйлердегі үлес­кер­лер өздеріне тиісті үйлерді ала­тынына көзі жет­кенін атап өтті. Бірақ бола­шақ­та үлескерлер осын­дай жағ­дайға тап болмауға өздері де бекем болулары керек, деді Мемлекет басшысы.

Қазір мұнда құрылыс-монтаж жұмыстары аяқталып, аумағын абаттандыру, сыртқы инженерлік желілерді тарту, автотұрақты жай­ластыру секілді жұмыстар жал­ғасып жатыр. Жоспар бой­ын­ша кешен жылдың төртінші тоқ­са­нын­да пайдалануға беріледі. Айта кетерлігі сол, ведом­ство­ара­лық комиссияның шешіміне сәй­кес 34 нысан проблемалық болып саналады. Соның 19-ның құры­лысын Үкімет «АҚҚБ «Жаңа құрылыс» ЖШС-ін тартып, рес­публикалық бюджеттен қаражат бөлу арқылы аяқтап жатыр. Бү­гінгі күні 19 нысанның 17-нің құрылысы аяқталып қалды. Со­ның бірі – аумағы 540 мың шаршы метр болатын «Тұрсын Астана» ТК. Бүгінгі күні 5360 үлескер өкіметтің көмегімен тұрғын үйге қол жеткізді. Президент Н.Назарбаев Есіл­дің сол жағалауындағы «BI Village» коттеджді тұрғын үйлер алабының ашылуына да қатысты. Осы жерде Елбасы коттедж­дер­дің біріне кіріп, оның тұрғын­да­рын жаңа қоныстарымен құт­тық­тады. Өзінің алған әсерін журналистермен бөліскенде Елбасы: «Біз орталықты салдық, енді қа­ланың төңірегінде халыққа жай­лы осындай жекеменшік үйлер салынуда. Үй саламын деген ас­та­налықтар осындай архитектурадан үлгі алуы қажет. Мұндай шағын аудандарда біртекті архитектура болуы керек. Көшелер мен олардың бояулары үйлесімді болса, сәнді болып көрінеді», деді. Соны­мен бірге, Президент биік қамал­дардан құтылу керектігін айтты. Құрылыс жұмыстарын жүргі­зіп жатқан «Вi Group» компа­ния­сының бас директоры Айдын Рахымбаевтың айтуына қараған­да, осы алапта 9 коттедждер кенті болады. Бүгінгі ашылып жатқаны – соның біріншісі. Оның 30 пай­ыздайын сатып алған. Кот­тедж­дердің бір шаршы метрінің құны 1150-1350 АҚШ доллары көле­мінде көрінеді. Ал коттедждің өз алаңы 113,9 шаршы метрден 350 шаршы метр аралығында. Алап­тың жалпы алаңы – 8,5 гектар. Ал­ғашқы кент 94 коттеджден тұрады. Жақсыбай САМРАТ, Суреттерді түсіргендер С.БОНДАРЕНКО, Б.ОТАРБАЕВ.