Білім көкжиегіндегі өзара ықпалдастықтар

Жуырда Ресей Федерациясының астанасы Мәскеу қала­сын­да халықаралық ғылыми-техникалық орталықтың Бағдар­лау­шылар кеңесінің 53-ші мәжілісі болып өтті. Аталмыш шараға еліміздің атынан Қазақстан Республикасы Білім және ғылым министрі Бақытжан Жұмағұлов қатысты. Жиын ба­рысында министр әлемдік ғылыми-техникалық үдерістер­дің жетістіктері жайлы сөз қозғап, ТМД елдері арасындағы атал­мыш ба­ғыттың қарқынымен ой бөлісті. Мәжілісте ХҒТО жобаларының іске асырылу нәтижелері тал­қыланды. Сондай-ақ, көп қырлы ғылыми-техникалық ұйымды құру қажеттілігі туралы да сөз болды. Ең бастысы, 2011 жылғы тұрақты дамуды жоспарлау мәселелері қарастырылды. Қазақстан Республикасы Білім және ғылым министрі Бақытжан Жұмағұлов Өңдеу және жаңа технологияларды коммерцияландыру орталығын дамыту қорын аралап шықты. Онда «Сколков» қорының объектілерінде болып, қазақстандық және ресейлік ғалымдардың ғылыми жетістіктеріне байланысты ой-пікірлермен танысты. Сондай-ақ, ол РФ Білім және ғылым министрі А. Фурсенкомен кездесіп, білім, ғылым және инновация саласындағы екі жақты ынтымақтастық мәселелерін талқылады. «Егемен-ақпарат».