Жастар мәселесін қозғады

Түстен кейін ИКҰ жастар фо­румының бас хатшысы, елші Эль­шад Искандеров журналистерге арнап брифинг өткізді. «Жастар фо­румы ИКҰ аясында 2005 жылы құрылды. Біздің штаб-пә­те­ріміз Ыстамбұл қаласында ор­наласқан. Қатарымызда 41 қаты­сушы ел бар. Ұйым мақсаты ислам елдеріндегі жастар саясатын үйлестіру, жастардың интеллек­туал­ды әлеуетін дамыту болып табылады. Тағы бір алға қойған міндетіміз әр елдер жастарының арасындағы үнқатысуды бекіте түсу. Жастар форумы көптеген ұйымдардың әріптесі болып табылады. Бұл баяндама бірінші рет жарияланады. Форумның негізгі мақсаттарының бірі – мемлекеттердегі біздің жастарымыз тап болатын мәселелерді шешуге көмектесу. Ол үшін азаматтық қо­ғаммен тығыз байланыса оты­рып, үкіметке кеңес береміз. Ке­ңес беруіміз үшін ең алдымен мұ­сылман елдеріндегі жастар үшін қандай тақырып мәселелі екенін анықтап алуымыз қажет. Және олар өзге аймақтардағы жастар мәселесінен айырмашы­лы­ғы қандай? Осы үшін біз ар­найы зерттеу жүргізген бола­тын­быз», деді ол. «Нәтижесінде 4 құрлықта өмір сүретін 57 ислам елдері жас­тарының мәселелерін нақты баян­дайтын ешқандай сарап­та­ма­лық баяндама бұрын-соңды бол­мағандығын білдік. Мұндай зерттеу жұмысын мұсылман елдері де, әлемнің басқа елдері де жүр­гізбеген екен. Бізде нақты мәсе­лелер бойынша бірқатар зерттеу жұмыстары бар. Бұл зерттеу жұ­мысын біз кеше жарияладық. Сонымен қатар, мынадай мәселе бар. БҰҰ жастар категориясына 25 жасқа дейінгі, ал жастар фору­мы 34 жасқа дейінгі адамды анық­тауды ұсынып отыр. Осы орайда, ИКҰ-ға мүше 57 елдегі жастардың орташа санын алатын болсақ, бұл сан 30 млн. адамды көрсетеді», деді Э.Искандеров. Баяндама гендерлік теңдік, аштық, денсаулық сақтау, кедейлік, заңның үстінен қараушылық, адам құқығы, балалар мен жас­тардың құқын қорғау, ақпараттық технология рөлі, қару-жарақты текетірестер, климат өзгерісі және тұрақты даму секілді мәсе­ле­лерді қамтиды. Сонымен қатар, көшбасшылықты дамыту да назардан тыс қалмаған. «Біз көш­бас­шы болатын адамдарды дай­ын­дамай болашақта үлкен саяси мәселелерге тап боламыз. Ұрпақ­тар сабақтастығының үзілуі бар. Біз көшбасшылық тақырыбына сөз қозғаған кезде кейбір елдерде аталған сөзге байланысты кү­мән­мен қарайды. Мен көтерген мәсе­леден бөлек түсінік пайда болды. Тағы бір айта кететін жәйт, мұ­сылман елдері жастары арасын­дағы мәдени үнқатысу. ИКҰ ел­де­рінің 26%-дайы жастар деген категорияға кіреді. Мұсылман әле­міндегі жастар Батыс әлеміндегі жастардан 2 есеге көп. Ал олар­дың мәселелерінің тізімі білімнен басталады, деді жастар фо­румының бас хатшысы. Баяндама соңғы кездері мұ­сыл­ман әлемін қамтыған әлеу­мет­тік өзгерістер барысында жа­рия­ланды. Онда халықаралық қо­ғамдастыққа әлемдегі 4 құр­лық­ты қамтитын 300 млн. жастың шынайы жағдайы туралы толы­ғырақ ақпарат беруге бағыт­талған мәліметтер бар. Ол өз тұр­ғысында жаңа, алғашқы сарап­тамалық баяндамада 57 ИКҰ еліндегі жастардың ағымдағы дамуы мен білімнен бастап кең спектрлі мәселелерді қамтиды. Келтірілген мәліметтер нақты дерек көздеріне сілтеме жасайды. Венера ТҮГЕЛБАЙ.