Йемен Президенті Али Абдалла Салехтің Сауд Арабиясындағы емделуі 6 айға созылуы мүмкін.

Атом стансасын тоқтатып тастады Шотландиядағы Torness АЭС-ның екі қуат блогының жұмысын кәдімгі теңіз медузалары тоқ­та­тып қойыпты. Сөйтсе, атом станса­сында реак­торларды суытуға пай­даланы­латын теңіз суындағы медуза­лардың сүзгіні бітеп тастағаны сондай, ол автоматты түрде тоқтап қалған. Қазіргі күні EDF Energy компаниясының операторлары сүз­гіні тазарту үстінде көрінеді. Атом стансасының жұмысы тек алдағы аптада ғана жалғасады деп күтілуде. EDF Energy компаниясы өкілінің мәлімдеуінше, реактор айналасындағы қоршаған ортаға  залалын тигізеді деп жорамал жасауға еш негіз жоқ. Жалпы, бұл медузалардың реакторлар жұмысына алғашқы тигізген кесірі емес, осыдан бұрынғы аптада да Жапо­ниядағы «Симанэ» стансасының сүзгісін де медузалар кептеп тастаған болатын. Шегіртке шойын жолды басып қалды Ішкі Моңғолиядағы шойын жол бойын шегіртке басып, олар алдымен пойыз­дар­дың жүрісін баяу­лату­ға мәж­бүрлеп, одан соң тіпті тоқ­татып тастады. Шегірт­келердің тұта­са қаптаға­ны соншалық, алға­шын­да баяу ғана жылжыған жүк пойызы ақырында 3 сағатқа жүрісін мүлде тоқтатыпты. Оқиғаны көзімен көрген жол полициясының офицері Удан Фу Цзяньго: «Шегірткелердің электр жү­йесінде бұлайша қысқа тұйықталу жасап, оның жүрісін тоқтатуға дейін баратынын көрмек түгілі естіген емеспін», – деп қайран қалғанын жеткізген. Мамандардың айтуынша, шегіткелер шойын жолға тамақ іздеп келген. Өз жолындағылардың барлығын жусатып, ағаштардың  жапырақтарына дейін жеп, сиди­тып кеткен жәндіктерден жол бойын тазалауға арнайы жұмыс­шылар алдыруға тура келген. Қолдарына күрек, сыпырғыш алып обыр шегірткелерден жол ар­шыған жұмыскерлер арқасында ғана пойыздар жүрісін жалғаған көрінеді. Сенаторлар каникулға шықпайды АҚШ сенаторлары 4 шілдедегі Тәуелсіздік мерекесінде берілетін демалыстан бас тартып отыр. Демо­краттардың лидері Гарри Рид «Заң шығарушылар ел тарихында тұң­ғыш рет дефолттық жағдай туып отырғанда демалып жата алмайды, біз Вашингтонда қаламыз», дейді. Сәрсенбіде респуб­ликашылар да Вашингтонда қалатындықтарын мәлімдеді. АҚШ-тағы бір-бірімен тайталасқан екі партия арасында бірлесіп жұмыс жасау жайында жиі-жиі айтылғанымен, олардың мемлекеттің бюджет тапшылығын қысқарту мен қарыз мөлшерін белгілеуде келісімге келетіндіктеріне сенім жоқ, дейді ақпарат көздері. Обама әкімшілігі егер 2 тамызға дейін бюд­жет туралы заң қабылданбаса, тек АҚШ-қа ғана емес, бүкіл әлемдік экономикаға әсері тиетін дефолт қаупі бар деген ескерту жасады. Қазіргі күні мемлекеттік қарыздың лимиті 14,3 триллион долларды құрап отыр. Монако ханзадасы отбасын құрды Еуропа жұртшылығы сұғын қадаған сүрбойдағы Монако ханза­дасы Альберт Екінші 33 жастағы оңтүстікафрикалық спортшы қыз Шар­лен Уиттстокқа үйленді. 53 жасқа дейін қанша сұлу көзін қадаса да үйленбеймін деп жүрген ханзаданың екі әйелден некесіз екі баласы  бар. Ал қазіргі таңдау түсіп отырған қалыңдығымен  ханзада   2000 жылы танысқанымен, араларындағы сезім ұшқыны 5 жылдан кейін пайда болғанға ұқсай­ды. Альберт ханзаданың үйленбеймін деген ұста­нымының елді алаңдатқаны соншалық бұл ел таққа егер еркеккіндікті мұрагер болмаған жағдайда қыздар мен жиендер де отыра алады деп конституцияларына өзгеріс енгізуге де мәжбүр болған-тын. Тақ иеленгендеріне 700 жылдан асқан, Еуропадағы патшалық көне династия Гримальди әулеті нағыз қуаныш пен үмітке бөленіп отырған сыңайда. Йемен президенті емделіп жатыр Өзінің атын айтпауын өтінген мәлімет беруші Оның жағдайы ауру­ханаға келген жағдайымен салыстыр­малы түрде айтқанда жақсы, бірақ, денесінің көп жері күйгендіктен және пластикалық операциялар жасал­ған­дықтан күрделі күйде қалып отыр, дейді. Президенттің халыққа теледидар арқылы үндеумен шығуы мүмкін бе деген сауалға ол: «Жоқ, президенттің хал-жағдайы әрі бет-әлпеті олай жасауға келмейді», деп атап өткен. Интернет материалдары негізінде әзірленді.