Елордадағы экшн-фильм фестивалі

Кеше Бейбітшілік және келісім сарайында салтанатты жағдайда ашылған екінші халықаралық «Астана» экшн-фильмдер фестиваліне Қазақстан, Америка мен Ресейдің белгілі киножұлдыздары қатысуда. Фестиваль шілденің 5-іне дейін жалғасады. «Астана» экшн-фильмдер фести­ва­лі­­нің қалай дүниеге келгенін осы идея­ның авторы Тимур Бекмам­бетов: «Ав­торлық және детективті жанрда тү­сірілген фильмдерге арналған фестивальдер көптеп қолға алынса, экшн-фильмдерге мұндай ауқымды бірде-бір шара арналмаған екен. Неге осыны Қазақстанда жүзеге асырмасқа деген идея туды да, сол ұсынысымызды Астана әкімдігіне жеткіздік. Қала әкімі Иман­ғали Тасмағамбетовке рахмет, сөзі­мізді жерге тастамай, мұны ой­да­ғыдай жүзеге асыруымызға мүмкіндік туғызды. Екінші кинофестиваль барысында жұртшылық белгілі режиссерлердің 20-ға тарта тамаша кинотуынды­ла­рын тамашалап, АҚШ, Еуропа, Азия мен ТМД елдері режиссерлерінің өнеріне қанығатын болады. Түрлі елдердің кинематографистері қаты­суы­мен өтетін дөңгелек үстелдер мен шеберлік сы­ныптарының өнердегі ба­лауса қа­нат­тарға көл-көсір пай­дасы тиеді деген сенімдеміз», деп баяндады. Мұхит асып келген америкалық қонақтар мен Ресейлік өнер тарланда­рын, қазақстандық театр және кино өнерінің шеберлерін Бейбітшілік және келісім сарайы кіреберісіне төселген қызыл кілеммен құрметтеп жұрт төрге оздырды. Көз алдарынан өтіп бара жатқан Майкл Мэдсен, Арманд Ассанте сынды майталмандардан қолтаңба алып, суретке түсудің ретін тауып қал­ған жанкүйерлер қуанышында шек жоқ. Бір тұста ресейлік режиссер, жерлесіміз Наталья Орынбасарованың ба­ла­сы Егор Кончаловский жастардың кө­ңілін қалдырмай қолтаңба беріп жатса, қапталдаса өткен белгілі тележүр­гізуші Екатерина Стриженова жұрт­шылық бейіліне риясыз көңілмен қол бұлғап бара жатты. Дмитрий Нагиев, Гоша Гуценко, кәсіпқой боксшы Николай Валуев жан-жақтан қаумалаған жастар тобының ішіне еніп кеткен. Голливудтың белгілі актері Стивен Сигал кілемге аяқ басысымен халық Американың атақты өнерпазына ерекше көңілмен құрмет көрсеткен. Бәрін айт та, бірін айт, фестиваль қазақ ұлттық кино өнеріне үлкен жол ашып, әлемдік деңгейге көтерілуге мүмкіндік туғызбаса, осынша у-дудың бәрі бос. Сондықтан экшн-фильмдер фес­тивалінің басты мақсаты да түптеп келгенде осыған саяды. Отандық кино­өнерін өркендету, дамыту, айтулы тұлғаларды Қазақстанға тарту арқылы қазақ киносының мәртебесін көтеру болып табылады. Сол себепті де мерекелік кілемнен Асанәлі Әшімов бас­таған Фархад Әбдірайымов, Әмір Қа­рақұлов, Бақтияр Қожа, Дәулет Әбдіғапаров, Қарлығаш Мұхамед­жанова сынды қазақ киносының белгілі өкілдері өткенде көрсеткен жұрттың ықыласы алабөтен. Соңғы жылдары кино өнерінің бойына ептеп қан жүгіре бастағаны сезіледі. Осынау табысқа елімізде өтетін кинофестивальдердің тигізген ықпалы аз емес екенін байқадық. Қарашаш ТОҚСАНБАЙ.