Ақын мен батыр бейнеленген дәптер

Орал қаласында Абай, Райымбек батыр, Сырым, Махамбет, Исатай, Құрманғазы, Дина сынды ұлтымыздың ұлы тұлға­лары­ның келбеті бейнеленген дәптерлер шығарыла бастады. Ел тәуелсіздігінің 20 жылдығына орай «Нұр Отан» ХДП БҚОФ-тың «Жайық пресс» ЖШС-дағы бастауыш ұйымының мұрындық болуымен аталмыш  серіктес­тіктің баспаханасында басылған бұл дәп­тер­лердің әрқайсысы әзірге 500 данамен шы­ғып, көпшілікке жол тартты. 36 беттік дәп­тердің бағасы – 65 теңге. «Қазір оқу­шылар негізінен шетелдік эстрада, спорт жұлдыздарының суреттері бейнеленген дәптерлерді алатыны рас. Ол болашақ ұрпағымыздың тәрбиесіне де әсер етеді, –деді осынау отандық өнімнің тұсаукесер шарасында «Жайық пресс» ЖШС бас директоры Жантас Сафуллин. – Біз өзіміз оған балама ретінде ешнәрсе ұсынбай отырып, бұл жайтқа ренжи алмаймыз. Міне, осы олқылықтың орнын толтыру бағы­тында  жаңа істі қолға алып отырмыз». Тұсаукесерге қатысқан Орал қалалық білім беру бөлімінің бастығы Жансұлу Төремұратова оқушының негізгі құралында бабалар бейнесінің салынуы отансүйгіштік сезімді қалыптастыруға оң ықпал ететінін тілге тиек етті. Ал дәптер мұқабасындағы Абай мен Махамбет секілді ұлылары­мыз­дың бір ауыз өлеңінің өзі жастарға ой салып, тұлғалардың өмірдерегі жайлы ақпа­раттар да балалардың жадында тез жатта­латындығына мән берді. Орал медициналық колледжінің дирек­торы, қалалық мәслихаттың депутаты Мақсот Берген сабақ кезінде оқушылар­дың алдында тұратын дәптерінің алғашқы бетінде даңқты ата-әжесінің кескін-келбеті бейнеленуі, олардың өнегелі өмірінен сыр шертілуі жас ұрпақтың бойына ұлт­тық рухты дарытуға себепші болатынын айтты. Отандық тауардың таныстырылымына «Нұр Отан» ХДП БҚОФ,  облыстық тілдері дамыту басқармасының өкілдері, білім жү­йесінің қызметкерлері, ата-аналар мен журналистер қатысты. Темір ҚҰСАЙЫН, Батыс Қазақстан облысы.