Аталған музей-қорықта «Тірі жүргендеріңіз үшін рахмет» атты фотосуреттер көрмесі де өтіп жатыр. Көрмеге Ұлы Отан соғысына қатысқан және бүгінде көзі тірі 64 өскемендік ардагердің портреттері қойылған.
«Жыл өткен сайын ардагерлеріміздің қатары сиреп барады. Біз бұл көрмені алдағы уақытта толыға түсетін экспозицияның алғашқы бөлімі деп есептейміз. Соған орай қандай да бір себептермен осы экспозицияның кейіпкері бола алмаған ардагерлердің туған-туыстарына музей-қорықтың Қайсенов көшесі, 67 мекенжайындағы ғимаратына келіп, ардагер туыстарының суретін әкеліп берулерін сұраймыз. Өйткені, келешек ұрпақтың жарқын өмірі үшін жан беріп, жан алысқан әрбір майдангер аталған галереяден лайықты орын алуы керек», дейді музей-қорықтың қызметкері Ғафура Сәрсенбайқызы.
Азамат ҚАСЫМ,
«Егемен Қазақстан»
ӨСКЕМЕН
Суретті түсірген
Алексей МАЗНИЦИН
