Алтын алқаптағы қарбалас

Ақмола облысының диқандары биыл 4,5 миллион гектар егіннен мол өнім алуға үмітті. Ауыл ша­руа­шылығы құрылымдары үстіміз­де­гі жылы дәнді дақылдар алқабын былтырғыға қарағанда 124,6 мың, майлы дақылдар аумағын 61,8 мың гектарға ұлғайтты. Науқан сынына 9 мыңнан астам комбайн жұмыл­ды­рылса, мұның 923-і шетелдік қуатты техникалар. Жаңа егіннің ас­тығын қабылдауға 544 механи­ка­лық қырман, 612 автотаразы, 167 дана дән кептіргіш дайындалды. Мұның өзі бітік егінді қысқа мерзімде әрі ысырапсыз жинап алуға мүмкіндік береді. Кеше алғашқы болып ораққа кіріскен Жарқайың ауданы 508222 гектарға дәнді және бұршақ дақыл­дарын еккен еді. Әсіресе, «Интернационал Астана», «Кен-М», «Ақ­тө­бе-О» жауапкершілігі шектеулі серіктестіктерінде егін жинау қар­қынды жүргізілуде. Интернацио­нал­­дық механизаторлар бір күнде 2000 гектардың егінін дестеге жы­ғып, 200 гектардың астығын бас­тыр­ды. Қазірше гектар түсімділігі 14 центнерден айналуда. Ал, қал­ған екі шаруашылықта сәйкесінше 360 және 450 гектар алқаптың егіні жиналды. Бұларда гектар берекелілігі 27 центнер болып отыр. Бақберген АМАЛБЕК, Ақмола облысы, Жарқайың ауданы.