Таң сәріден үміттерін үкілеп Оқушылар сарайына ағылған 538 қатысушы әділқазылар алқасының алдында қазақша, орысша, ағылшынша, қытайша және өзге де тілдерде де ән салып, бақтарын сынады. «Бақ сынады» деп айтқанға жеңіл болғанымен, тек жарқын болашақтан үміт күтетін, кең ауқымды байқауға алғаш рет қатысып отырған бала көңіл үшін бұл байқау толқынысқа толы маңызды сәт екені айтпаса да түсінікті. Әр бұрышта дайындық жасап, дауысын жаттықтырып жүрген 7 мен 13 жас аралығындағы балаларды жетектей жеткен ата-анадан бастап, оларға қолдау білдіріп келген туған-туыс қауымын қосқанда, Оқушылар сарайы бір сәтке үлкен мереке алаңына айналып кеткендей еді.
Дүбірлі байқауға тек оңтүстік шаһардан ғана емес, Өзбекстан мен Қырғызстаннан да ат арытып жеткен кішкентай дарындар өз қабілеттерін көрсету үшін барын-ақ салды. Әлбетте, әділқазылар алқасын айрықша даусымен тәнті еткен талай таланттың бар екені рас. Дегенмен, 9 жасар Нұрлыбек Сапарбай мен 11 жасар Жәнел Қасенова жүздің ішінен жүйрік шығып, қалалық іріктеу кезеңінің қорытындысы бойынша жеңімпаз атанды.
«Мен бұрын мұндай ән байқауларына қатысып көрген емеспін, бірақ жеңімпаз атанатыныма сендім», дейді қуаныштан жүзі бал-бұл жанған Нұрлыбек. Ал қатты толқып, қуаныштан көзіне жас үйірілген Жәнел: «Байқауға қатысуға келген осыншама баланы көргенде жеңіс маған бұйыра қоймайтын шығар деп ойладым. Бірақ бар күшімді жинап, іріктеудің барлық кезеңдерінде өзімді сенімді ұстауға тырыстым. Жеңіске жеткеніме қатты қуанып тұрмын!», деді.
Айта кетсек, осымен екінші рет өткізіліп жатқан «Бала дауысы» ән байқауы биылғы жылдың 12 мамырында Павлодар қаласында басталған болатын. Павлодар және Шығыс Қазақстан облыстарынан қатысқан 347 баланың ішінен 2 қатысушыны іріктеп алған шығармашылық топ ат басын Алматыға тіреген еді. 23 маусымға дейін созылатын іріктеу кезеңі аралығында бұлбұл дауысты бала әншілерді табу мақсатында «Бала дауысы» енді еліміздің қалған облыстарын аралап шықпақ.
16 аймақтан 16 жеңімпаз анықталған соң жеткіншектер Толқын Забирова, Медеу Арынбаев, Мәдина Сәдуақасова, Маржан Арапбаева, Мөлдір Әуелбекова, Жұбаныш Жексенұлы сынды танымал тәлімгерлерден, кәсіби музыканттардан, хореограф, стилистерден музыка мектебінде бір ай тәлім алатын болады. Ал қазан айының 27-29 жұлдызы аралығында «Алматы Арена» мұз сарайында КТК телеарнасы арқылы тікелей эфирде өтетін «Бала дауысының» супер-финалында кәсіби қазылар алқасы мен смс-дауыс беру арқылы телекөрермендер жүрегін жаулай білген хас талант париждік Диснейлендке тегін қыдырып қайту жолдамасына және Қазақстандағы ең үздік музыкалық оқу орындарының бірінің грантына ие болмақ.
Мира БАЙБЕК,
«Егемен Қазақстан»
АЛМАТЫ
