Аула жарысынан Олимпиада жарысына дейін өтіп жататын бәсекелердің небір құдіреттілерін көріп, куә болған басымыз бар. Одан бері түсер болсақ, әлем чемпионаты, Азия, Еуропа чемпионаттары, Әлем кубогы... Ол жарыстар әлемнің небір жалы күдірейген мегаполис қалаларында өтіп жүр – Лондон, Париж, Нью-Йорк, Мәскеу, Астана... Ал, қазақ күресінен кезекті Әлем кубогының бәсекесі ауылда өтеді. Бұл ғажап оқиғаны өмірге әкеліп отырғандар – Дүниежүзілік қазақ күресі федерациясы! Айтса сенбейсіз, бұл жарыс 26-28 мамыр аралығында Шығыс Қазақстан облысы, Тарбағатай ауданының Ақсуат кентінде өтеді! Жарысқа Қазақстаннан өзге 25 мемлекеттің спортшылары шақырылып, олар келісімін беріп, қатысқалы отыр.
«Бұл Қазақстан Тәуелсіздігінің 25 жылдығы аясында өткелі отырған жарыс, сондықтан да жарысқа 25 мемлекеттің балуандарын шақырдық!», дейді федерацияның жауапты қызметкерлері. Тамаша ой, тамаша жоба, тамаша тарту!
Жақында қолыма осы жарысқа арнайы шығарылған түрлі-түсті бағдарлама-кітапша түсті. Шығыс Қазақстан облысының әкімі Д. Ахметов, Мәдениет және спорт министрі А.Мұхамедиұлы, Дүниежүзілік қазақ күресі федерациясының президенті И.Әбішев мырзалар осы жарысқа сәттілік тілеп, сөз арнаған екен. Әлем кубогының ауылда өтетінінің халықтық маңызы осы жерде баса айтылғанына көз жетті. «Кезінде еліне, ұлтына қызмет еткен Ырғызбай әулие жүлдесі үшін өткелі отырған бұл Әлем кубогы жолындағы жарыс елімізде Елбасы алға қойып отырған бұқаралық спортты кеңінен өркендету жолындағы жұмыстарды барынша жандандырады» – деп атап өтеді Д.Ахметов.
«Жыл сайын қазақ күресінен Ырғызбай Досханаұлы жүлдесі үшін өтетін халықаралық жарыс елімізде ұлттық спортты өркендетуге өлшеусіз үлес қосып келеді!» – дейді А.Мұхамедиұлы. «Мұндай алқалы жарыс өткізгелі отырған Шығыс Қазақстан облысы тек еңбеккерлер, философтар, ақындар аймағы ғана емес, еліміздің спорттық даңқын асырып, әлем, Олимпиада чемпиондарын өсірген өлке!» – деп атап өтеді И. Әбішев.
Осы жарысты ауылда өткізу жобасының авторы, Дүниежүзілік қазақ күресі федерациясының вице-президенті Беделхан Камалханұлы былай дейді: «Аты мен істеген елдік ісі бүкіл Қазақстанға белгілі Ырғызбай Досханаұлы жүлдесі үшін өтетін бұл Әлем кубогының маңызы – шеттен келетін қонақтарға елді, жерді көрсету, жер жәннаты Тарбағатайды аралату. Бұл біздің туризмдегі мүмкіндігімізді де паш ету!».
Ал кездесіп, сұхбаттасқанда Дүниежүзілік күрес федерациясының атқарушы директоры Талғат Мәзібаев ініміз маңызды екі ой айтты. Бірінші, Қазақстан Тәуелсіздігінің 25 жылдығын біз осы жыл көлемінде де ту етіп ұстасақ нұр үстіне нұр! Екінші, Әлем кубогы секілді жарысты ауылға тартып жатсақ, оның да маңызды себебі бар – біз спорттағы ел намысын қорғайтын ұл мен қызды ауылдан іздеп, ауылдан тәрбиелесек, одан кем болмаймыз. Қажымұқан бабамыз да, Ғұсман Қосанов, Әмин Тұяқов, Әбдісалан Нұрмақанов, Әбілсейіт Айханов аталарымыз да, Жақсылық Үшкемпіров ағамыз да ауылдан шыққан!».
Әлем кубогы жарысының ауылда өтуі ғажап оқиға. Әрі бұл жарыс Бүкіләлемдік күрес федерациясының күнтізбесіне енген жарыс. Әрі, жарысқа қатысатын балуандар арасында күрестің әр түрінен әлем, Олимпиада чемпиондары келеді деп күтілуде. Олай болса, ауылда өтетін Әлем кубогы жарысының жолы ашық болғай!
Несіп ЖҮНІСБАЕВ,
журналист,
Қазақстанның еңбек сіңірген қайраткері
