Осындай күрделі мәселелерге арналған ауқымды жиын «Мәдениеттер тоғысы: қолданбалы әлеуметтік лингвистика және шет тілдерін оқыту мәселелері» деген тақырыпта елордадағы Н.Л.Гумилев атындағы Еуразия ұлттық университетінде өткен еді. Оған осы университеттің жалпы тіл білімі және аударма теориясы кафедрасы, С.Демирел университетінің филология және педагогика факультеті, Қазақ гуманитарлық заң университеті ұйытқы болды.
Халықаралық конференцияның негізгі мақсаты – тілді оқытуда теория мен практиканы ұштастыра білу, зерттеу нәтижелерін қолданысқа енгізуді жүйелі түрде іске асыру болып саналады. Тілді оқыту әдістемесі, қазіргі лингвистика мен әдебиеттану, көп тілді білім беру ісі, тілді оқытудағы инновациялар мен арнайы мақсаттарға бағытталған ағылшын тілі, аударма жұмысы жан-жақты сарапқа салынған отырыста АҚШ-тың Аризона, Мичиган университетінің профессорлары Пауль Кей Матсуда, Сузан Касс, Лондон корольдік колледжінің профессоры Бен Рамптон және өзге де шетелдік ғалымдар баяндама жасап, отандық ғалымдармен тәжірибе алмасты. Әсіресе, көптілділікті сақтай отырып, мемлекеттік тілді жетік меңгеру және бұл жұмысты жастар арасында баянды жүргізу жайы жан-жақты қозғалды. Жалпы саны 250-ге жуық ғылым саласының өкілдері қатысқан басқосуда қазақ тілі мен өзге тілдерді ұштастыра отырып меңгеру әдістемесі сараланды.
Сүлеймен МӘМЕТ,
«Егемен Қазақстан»
