Ведомство басшысының пікірінше, бүгінгі таңда Қазақстанның геосаясаттағы рөлі арта түсіп келеді. Бұған айғақ ретінде еліміздің Ұлы Жібек жолын қайта түлету жөніндегі кең ауқымды инфрақұрылымдық жобаға белсенді қатысуын айтуға болады.
– Қазақстан басшысы «Нұрлы жол» бағдарламасын жария етті. Президенттің сөзіне қарағанда, жолдарды күретамыр десек, Жібек жолы оның артерияларын кеңейте түседі. Оның үстіне, жоғары сапалы трассалардың Талдықорған мен Орал қалаларын жалғап жатқаны бір мәселе, ал Ляньюньган мен Шанхайдан шығып, Қазақстан аумағы арқылы Еуропа мен Ресейді жалғайтын заманауи жолдардың құрылысы басқа мәселе, – деді министр. – Президент қай кезде де теңіз тасымалдарын мысал ретінде келтіріп келеді. Олар арзан болғанымен, баяу: Шанхай портынан шыққан тауар Роттердамға дейін бір ай жүруі мүмкін. Осы жерде біз тасымал уақытын айтарлықтай қысқартуға мүмкіндік беретін баламалы нұсқа ұсына аламыз.
Осының арқасында еліміздің геосаясаттағы рөлі артады және Қазақстан транзиттен айтарлықтай көлемде пайда түсіре алады. Сөйтіп, теңіз портында жұмыс істейтін барлық логистика құрғақ портта да жұмыс істейтін болады.
Бұрнағы аптада Қазақстан қоғамында кең талқыланған келесі бір мәселе – Әзербайжанның банкротқа ұшыраған Халықаралық банкіне Біртұтас жинақтаушы зейнетақы қорындағы (БЖЗҚ) жинақтарды аударумен байланысты тәуекелдер болғаны анық. Бұл арада Дәурен Абаев қазақстандықтардың зейнетақы жинақтары мемлекеттің кепілдігінде болатындығына сендіріп, түрлі бағыттағы қауесетке нүкте қойғандай болды.
– Қазіргі кезде тексеру жұмыстары жүргізіліп жатыр, ал оның нәтижелері жұртшылыққа міндетті түрде жеткізілетін болады. Қазақстанда зейнетақы жинақтарына мемлекеттік кепілдеме қарастырылған, ал оны ешкім де алып тастаған жоқ, ол тіпті инфляцияны да ескереді. Сондықтан, зейнетақы тиесілі барша азамат оны алатын болады. Бұл жерде ешқандай да күмән болмауы тиіс, – деді ведомство басшысы.
Әзербайжан үкіметі банктің қарызын төлеу туралы шешім қабылдаған. Сондықтан, БЖЗҚ-ға да, Халықаралық банкке қаржы салған басқа компанияларға да ешқандай қауіп жоқ.
Банктер арасындағы келесі бір келісім – Халық банкі мен Қазкоммерцбанктің қосылуына қатысты айтқанда, Ақпарат және коммуникациялар министрі нақты нәтижелерге қол жеткізбей тұрып, бұл келісімнің не беретінін дәл болжау қиын екенін атап көрсетті.
– Банктердің қосылуы – қалыпты үдеріс. Бұл жерде азаматтардың депозиттерімізді жоғалтып алмаймыз ба деген алаңдаушылығы басқа әңгіме. Аса маңызды жайтқа назар аударғым келеді: Қазкоммерцбанк те, Халық банк те Қазақстан азаматтары салымдарына кепілдік беретін қаржы қорларына қатысушы болып табылады. Сондықтан, алаңдауға еш негіз жоқ, – деп сендірді Дәурен Абаев.
