Айтұлы ұлт поэзиясына көлденеңнен қосылған жүйрік емес. Әуелден ер-тұрманы бүтін, көненің көркем қазынасын тал бойына сіңірген, жаңаның жасампаз үлгісінен өнеге алған дарын. Кезінде ақынның өлеңдерін алғаш оқыған Мұқағали Мақатаев: «Несіпбектің өлеңдерінен жасандылық байқалмайды, жастыққа тән от бар. Ағынан жарылып, таусыла талаптану, ізденіс бар» десе, қазақ поэзиясының ірі өкілі Фариза Оңғарсынова: «...Үш ұйықтасаң да түсіңе кірмейтін небір асыл теңеулер, оқыс ойлар, ат басындай алтынға бергісіз оқшау образдар, ең бастысы, осының бәрі ұлттық поэзияның жөргегінде бөленіп, бесігінде тербелуі Несіпбекті қаламдастарынан даралай түседі», –
деген екен.
Бұл жолғы тұсауы кесілген туындының ерекшелігі – ақынның шығармашылығы жайлы пікір жазған, жырларына әдеби тұрғыдан баға берген авторлардың еңбегі түгелдей топтастырылуында. Ғұлама ғалымдар Рахманқұл Бердібаев, Серік Қирабаевты айтпағанда, ақының алдыңғы толқын ағалары Тұманбай Молдағалиев, Мырзатай Жолдасбеков және өзімен бірге жүрген қатарлас қаламгерлер – Жәркен Бөдешұлы, Жүрсін Ерман, Тұрсын Жұртбай, Серік Тұрғынбектің кеңге көсілген кемел ойлары рет-ретімен берілген.
Туындының тағы бір артықшылығы – кітапта жазылған соқталы қаламгерлердің сүбелі ойлары кейінгі әдебиет зерттеушілері үшін таптырмайтын құрал десек, туындының «Бостандық жырының бозжорғасы» деп аталуы ақынның болмыс-бітімін бойына сіңірген шығармашылық тағдыры тәріздес.
Тұсаукесер рәсімі кезінде ағынан жарыла ой-пікір айту үшін сахнаға көтерілген қаламгерлер түгелдей туындыға жоғары баға берді. Солардың бірі «Егемен Қазақстан» республикалық газеті» АҚ Басқарма төрағасы Дархан Қыдырәлі кітаптың ғылыми құндылығына тереңнен тоқтала отырып: «ақынның поэмалары тұтас дәуірдің эпикалық энциклопедиясындай, әсіресе қазақтың қара өлеңі мен шығыс шайырларының нәрлі шумақтары қатар өріліп, тұтасып тұрғандай үндеседі», деді.
Бекен ҚАЙРАТҰЛЫ,
«Егемен Қазақстан»
Суретті түсірген
Ерлан ОМАРОВ,
«Егемен Қазақстан»
