Келбеті келісті, қадамы жемісті

АРМИЯМЫЗ БИЫЛ ҮШІНШІ РЕТ ӘСКЕРИ ШЕРУГЕ ҚАТЫСПАҚ Қазақстан Республикасы Тәу­елсіздігінің 20 жылдығы мен Кон­ституция күніне арналған әскери шеруге әзірлік шілденің шіліңгір ыстығында басталды. Төгілген тердің текке кетпегенін елордамыз Астанада 30 тамыз күні өтетін әскери шеруде көз жеткіземіз. Оған 2500 әскери қы­меткер, 130-дан астам қару-жа­рақ пен әскери техника, сондай-ақ 60-тан астам ұшақ пен тік­ұшақ қатысады. Конституция күніне арналған әскери шеру биыл осымен үш­ін­ші рет «Қазақ елі» монументі ал­дында өткізілгелі отыр. Ел Президенті – Қазақстан Республи­касы Қарулы Күштерінің Жоғар­ғы Бас қолбасшысы Нұрсұлтан Назарбаевтың қатысуымен жа­ла­у­ын көтеретін әскери шеру биыл да басты оқиғалардың бірі бол­мақ. Қазақстандық әскери қыз­меткерлер құрлықта, әуеде күр­делі әскери техниканы жоғары кәсіби шеберлікпен басқара ала­тындықтарын паш етеді. Бар-жоғы үш жыл болса да дәстүрге айналып келе жатқан мерекемізді қазақстандықтар са­ғына күтіп, онда болар жаңа­лық­ты өз көздерімен көруге асығады. Биылғы шерудің өткен жылғы­мен салыстырғандағы ерекшеліктері мен жаңалықтарын ауыз тол­ты­рып айтуға болады. Біріншіден – тамыз айының 25-інен бастап Ел Президенті – Қазақстан Республикасы Қарулы Күштерінің Жоғарғы Бас қолбас­шысы Нұрсұлтан Назарбаевтың Жарлығымен Қарулы Күштері­мізде жаңа, жетілдірілген мерекелік және күнделікті киіп жү­ре­тін әскери киім үлгіcінің енгізілгендігі. Бір айта кетерлігі, Отан қорғаушылар Конституция күні, Ел Тәуелсіздігінің 20 жылдығы қарсаңында өтетін әскерлер шеруінде жаңа киім үлгісін тұңғыш рет киіп шығады. Демек, бұдан былай қазақстандық әскери қыз­метшілер еліміздегі әйгілі киім дизайнері Құралай Нұрқаділова әзірлеген жаңа мерекелік және күнделікті әскери формаға ауы­сады. Әскери киім қазіргі таңда Қазақстан армиясының әскери қызметшілері мен офицерлері ки­іп жүрген формадан ерекше. Оны әзірлеу кезінде тартымды талдаулар жасалып, бүгінгі күн­­нің талаптары, шетелдердің оз­ық тәжірибелері, сондай-ақ, әске­ри қызметшілердің тілектері мен ұсы­ныстары еске алынды. Қазіргі таңда Қазақстан эко­номикасының өсуі қазақстандық әскери қызметшілердің форма­сын ең жоғары халықаралық стан­дарттарға сай болуына жол ашуда. Біздің тоқыма фабри­ка­ларында аса төзімді мата үлгілері пайда болды. Осы формалардың отандық мекемелерде тігілуі де үлкен жетістіктің белгісі. Әскери қызметшілердің жаңа киім-кешегінің реңі де өзгеріске ұшырады. Құрлық әскерлерінің салтанатты және күнделікті киім үлгісі үшін «қара жусан» түс, ал Әуе қорғаныс күштері үшін – қа­ра көк түс қолданылса, Әскери-теңіз күштері әскери қызметші­ле­рінің киімі іс жүзінде өзге­ріс­сіз қалып, флоттың көпғасырлық дәстүрлері сақталды. Бас киімдер де өзгертілді, атап айтқанда фуражкалар. Ол қазіргі заманға сай үлгіге ие бол­ды. Тө­бесі кішірейтіліп, бар­лық ме­тал­дық фурнитура орнына кесте тігілді. Погон мен жең үс­тін­дегі белгілер дизайны жетілдірілді. Жоғары офицерлік құрамның салтанатты киім-кешегінде қол­да­­нылған кестелеу – лавр жа­пырақтарының ұлттық оюлармен үйлестірілуі киім үлгісіне сәнді сипат берді. Жаңа форманы киіп, сыннан өткізіп үлгерген әс­кери қызметшілер оның әдемілігі мен ыңғайлылығын, жайлылығын жә­­не барлық талаптарға сай ек­ен­дігін, жаңа келбетке де ие болғанын сезінді. Екіншіден – қазақстандықтар бұған дейін бұрын-соңды көр­ме­ген жаңа әскери техникалар мен жасақтарды еліміздің бас ала­ңы­нан биыл бірінші рет тама­ша­лайды. Механикаландырылған лек­ке танктерге қолдау көрсе­тетін жауынгерлік машиналар, ауыр оқ ататын жүйелер және жетілдірілген БТР-82 әскери тех­никасы қосылмақ. Үшіншіден – әскери шеруге тұңғыш рет мергендер жасағы мен Құрлық әскерлерінің таулы ат­қыштар бригадасының әскери қыз­метшілері қа­ты­са­ды. Құрама тау­лы жағ­дайда дұрыс ұр­ыс жүр­гізуі үшін бар­лық қа­жетті заманауи жаб­дық­­тар­мен қамтамасыз етілген. Биылғы әскери шеруге қаты­сушы лектер әр тектілігімен ер­ек­шеленбек. Әйел әскери қыз­мет­шілерден құралған екі колонна – «қорап» көз қызық­тыр­мақ. Мін­бер алдынан санитарлық нұс­қаушылардың топтасты­рыл­ған ро­тасы мен әскери азаматтармен бір сапта қолға қару алып жау­ын­герлік тапсырма орын­дау­ға әз­ір әйел әскери қызметшілер көп­ші­лікті тамсандырмақ. Төртіншіден – биыл ангарлар­ды артқа тастап, аспанда атой салатын 60-тан астам авиация­лық техникалар: дыбыстан да жыл­дам ұшатын шабуылдау­шы, май­дан­дық, бомбалаушы ұш­ақтар мен жауынгерлік тік­ұшақ­тар көп­шіліктің көзайымы­на айналмақ. Қанатты техниканың құла­ғын­да ойнайтын әскери ұшқыш­тар жауынгерлік тәртіп бой­ын­ша ұшып, «сына», «ромб», «пирамида», «жебе» тәсілдерін көр­сетеді. Астана қонақтары мен тұр­ғын­дары үшін нағыз сый­лық­ты «Ба­рыс-Жетісу» ұшу то­бы даярлап отыр. Мәселен, «Бә­й­терек» деп аталатын тәсілді олар аспанда сағатына 800 шақырым жылдам­дықпен ұшып келіп жа­сайтын болады. Ал «Нестеров тұзағын» Су-27 ұшағы звеносы сағатына 350 шақырым жыл­дам­дықпен ұшу арқылы шеберлікпен орын­да­мақ. Сөйтіп, аспанда өтетін әскери авиа думан әсер­лі­гімен есте қалмақ. Жүніс ОМАР, Қорғаныс министрлігі баспасөз қызметі  бөлімінің бастығы, полковник. ––––––––––––––––– Суреттерді түсірген Орынбай БАЛМҰРАТ.