Аға ұрпаққа адалдық

Бұл адамзат тарихында орын алған әлемдегі ең ірі ядролық техногендік апат болатын. Чер­нобыль атом электр станса­сын­дағы апатты залалсыздандыруға қатысқан 32 мың қазақс­тан­дық­тың қазір 6797-сі ғана жер басып жүр. Солардың қатарында болған 2 мың ақтө­бе­ліктің 278-і ғана аман-есен. Олар­дың 218-і мү­ге­дек. Үсті­міз­дегі жыл­ғы 26 сәуірде сол бір күр­делі кезеңде апатты залалсыз­дан­дыруға атса­лыс­қан жерлестерімізге орна­ты­латын ескерткіш-белгі­нің тұ­ғыр­­­тасы қойылған-ды. Конституция күні қарсаңында осы ескерткіш-белгінің салтанат­ты ашылу рәсімі болды. Оған Чернобыль атом электр станса­сын­да болған апатты залал­сыз­дан­дыруға қатысушылар, со­ғыс және еңбек ардагерлері, қала­лық­тар қа­тысты. Чернобыльдіктерге орна­тыл­­ған ескерткіш-белгінің сал­та­натты ашылуында сөз алған «Нұр Отан» ХДП облыстық филиа­лы­ның төрағасы, облыстық мәсли­хат­тың хатшысы Балғали Ордабаев апатты залал­сыз­дан­ды­руға қа­тысушылардың азаматтық пары­зын адал атқарғанын, олар­дың ерлік істері ешқашан ұмы­тыл­май­тынын, бұл тақсыреттің ұрпақтар жадында мәңгі сақ­та­латынын жеткізді. Жастарға пат­ри­оттық тәрбие берудегі че­рно­быльдіктердің өне­гелі істеріне тоқталды. Осы шараға арнайы келген Чернобыль ардагерлері одағы үйлестіру кеңесінің төрағасы Ба­қытжан Әшірбаев, Павлодар об­лыстық «Чернобыль одағы» қо­ғам­дық бірлестігінің төрағасы Омарбек Айтжанов Чернобыль атом электр стансасында болған техногендік апатты ауыз­дық­тау­дағы қазақстандықтардың ерен ерлігін кеңінен әңгімеледі. Ден­саулықтары мен өмірлеріне қауіп төніп тұрғанына қарамастан, жал­пыадамзаттық аждаһаны за­лал­сыздандырудағы ерлік істері қандай да құрметке лайық екенін еске салды. Соғыс және еңбек мүгедектері облыстық қоғамы­ның төрағасы Федор Чемоданов Елбасы Нұрсұлтан Назарбаевтың сарабдал саясатының нәтиже­сін­де жергілікті биліктің ардагерлер­ге, ауғандықтарға және черно­­быльдіктерге әлеуметтік қолдау көрсетуді жүйелі жүргізіп келе жатқаны үшін алғыс сезімін жеткізді. «Чернобыль құрбандары» қоғамдық бірлестігінің төрағасы Бақытжан Сатов чернобыль­дік­тер­ге тұрмыстық жеңілдіктер қа­рас­тырып, осы ескерткіш-белгіні қою­ға қолдау-көмек көрсеткен об­лыстық және қалалық әкім­дік­тер­ге шексіз ризашылығын білдірді. Ескерткіштің тұғыртасында «1986-1990 жылдары Чернобыль АЭС апатын залалсыздандыруға қатысқан ақтөбеліктерге тағзым етеміз» деп жазылған. Шараға қа­тысушылар өмірден озған чер­нобыльдіктерді бір минөт үнсіз­дікпен еске алды. Сатыбалды СӘУІРБАЙ. Ақтөбе облысы.