Берлинде зардап шеккендер арасында қазақстандықтар жоқ

Берлинде жүрген қазақстандықтарға адам көп жиналған орындарға бармаған жөн. Бұл туралы ИДМ туризм индустриясы департаментінің директоры Марат Иғали өзінің Facebook парақшасында жазды. «ҚР Инвестициялар және даму министрлігінің Туризм индустриясы департаментіне зардап шеккен қазақстандық туристер туралы ақпарат келіп түскен жоқ», – деді ол. ИДМ министрлігінің туризм индустриясы департаменті Германия аумағында жүрген туристерді сақ жүруге, адам көп шоғырланған орындарға бармауға шақырады. Әлемдік БАҚ-тың хабарлауынша, 2016 жылы 20 желтоқсанда Берлин орталығындағы Брайтшайдплац алаңындағы рождестволық жәрмеңкеде жүрген халықты жүк көлігі соққан, деп хабарлайды «ҚазАқпарат». Соңғы деректер бойынша, 12 адам мерт болып, 48 адам түрлі дене жарақатын алды. Куәгерлердің айтуынша, жүк көлігі бүкіл алаң бойымен жүріп өтіп, шыршаның жанына келіп тоқтаған.