Кеше Астанадағы Қазақстан Республикасы Тұңғыш Президенті музейінде еліміз Тәуелсіздігі мен Қазақстан ұлттық олимпиялық комитетінің 25 жылдығына арналған суретшілер конкурсының қорытындысы шығарылды.
Конкурс Қазақстан ұлттық олимпиялық комитетінің президенті Тимур Құлыбаевтың бастамасымен ұйымдастырылды. Ол бейнелеу өнері арқылы спортты насихаттап жүрген отандық суретшілердің шығармашылықтарына қолдау көрсету мақсатында өткізілді. Ал байқау шартына сәйкес, оған қатысқан туындылар Қазақстан спортының 25 жылдағы жетістіктері мен олимпизм идеологиясын бейнелеулері тиіс болатын. Нәтижесінде, жеті айдың ішінде конкурсқа еліміздің кәсіпқой суретшілерінің 30-ға жуық еңбегі келіп түсті.
Сарапшылар комиссиясы осы жұмыстарды саралай келіп, Бейбіт Әсемқұлдың «Жарқын болашақ» атты картинасын бірінші орынға лайықты деп тапты. Осы еңбегі үшін қылқалам шеберіне арнайы сертификат пен 5 миллион теңге тарту етілді. Сыйлығы 3 миллион теңгелік екінші орын «Самғау» деген полотносын ұсынған Жеңіс Нұрлыбаевқа берілді. Қазылар алқасы сондай-ақ, 1 миллион теңгелік сертификаты бар үшінші орынды «Жеңіл атлетика» деген еңбегімен келген Сембіғали Смағұловқа тапсырды. Конкурсқа қатысушылардың қалғандары Ұлттық олимпиялық комитеттің ынталандыру сыйлығын алды.
Талғат РАЙЫМБЕК,
«Егемен Қазақстан»
АСТАНА