Түркиялық туыстар тәжірибесі

Түбі бір туысқан түрік жұрағатының Қазақстанға ықылас-пейілі ерекше. Олар жыл сайын Түркістандағы Халықаралық Қазақ-түрік университетіндегі емханаға келіп, Қазақстанда әзірге мүмкіндігі шектеулі оталар жасап қайтатын. Бұл жолы Түркиядан арнайы келген дәрігерлер делегациясы облыс басшысы Жансейіт Түймебаевпен кез­десіп, жұмыс барысы жайлы әң­гі­мелесті. Жас балаларға көрсеті­ле­тін меди­циналық көмектің сапа­сын жақ­сарту, нәрестелер өлім-жіті­мін төмен­дету мақсатындағы тәжі­ри­бе­сі­мен бөлісуге келген жұмыс то­бы­на Түркия үкіметі жанындағы Ын­­ты­мақтастық және үйлестіру жө­­нін­­дегі агенттік ұйытқы болған. Дел­е­­га­­­ция­ны агенттіктің оқу бөлімі­нің бас­тығы Мустафа Хасим бастап келді. Екіжақты кездесуде тараптар бауырлас қос мемлекеттің қарым-қатынасы мен бірлескен жобалар жайын сөз етіп, жаңадан басталатын шеберлік сабағының нақты міндеттері бойынша әңгімелесті. Түркиядан келген мамандар облыстағы балалар мен босанатын әйелдерге медициналық көмек көрсету қызметінің дәрігер­леріне – неонатологтарға, офтальмо­логтар­ға, педиатрларға, акушер ма­мандарға, неонатальдық мейір­би­келерге теориялық және прак­тикалық дәрістер оқып, білік­ті­лігін жоғарылату бойынша ар­на­йы оқыту курсынан өткізеді. Об­лыс­тық балалар клиникалық ауру­ха­насының халықаралық технологиялар орталығының базасында өтетін шарада жаңа туған балаларда кездесетін түрлі сырқаттар кезінде тиімді реанимациялық көмекті сапалы жүргізе білуге, науқас және дені сау жаңа туған балаларға мамандандырылған күтім жасауға, жас сәбилердің көру қабілетінің төмендігін уақтылы анықтауға оқыту бағдарламалары жоспарланған. Сонымен қатар, медицина қызметкерлері жаңа туған балаларға реанимациялық көмек көрсету бойынша заманауи симуляциялық манекендерде тәжірибе жасап дағдыланады. Осындай оқыту бағдарламасы­мен таныстырған түркиялық дәрігер­лер мұндай тәжірибе алмасу шараларының бұған дейін әзербайжандық дәрігерлермен ұйымдастырылып, оң нәтиже көрсеткенін атап өтті. Түрік дәрігерлерінің дәрісі кезінде ерекше көзге түсіп, арнайы емтиханнан сүрінбей өткен бірқатар медицина қызметкерлеріне сертификаттар табысталып, оларға Түркияда білімін жетілдіруге жолдама беріледі. Түбі бір ағайынның көмегі дәрігер­леріміздің біліктілігін көтеруге осылайша септігін тигізіп келеді. Бақтияр ТАЙЖАН, «Егемен Қазақстан» Оңтүстік Қазақстан облысы