Депутаттар өңірлерге шығады

Кеше Парламент Мәжілісінде «Нұр Отан» партиясы фракциясының кеңейтілген отырысы болды. Онда «Қазақстан Республикасының нәтижелі жұмыспен қамту және жаппай кәсіпкерлікті дамыту бағдарламасы туралы» және «Нұрлы жер» тұрғын үй құрылысын салу бағдарламасы туралы» мәселелер талқыланды. Отырысқа Мәжіліс Төрағасының орынбасарлары Владимир Божко мен Гүлмира Исімбаева қатысып, соңғы­сы жиналысты жүргізіп отыр­ды. «Өздеріңізге белгілі, Мем­­лекет басшысы ағымдағы жыл­дың қыркүйек айында өткен Үкі­мет­тің кеңейтілген отырысында халық­ты жұмыспен қамту, жаппай кәсіпкерлік мәселесін Үкімет жұ­мы­сының басты бағытының бірі болып табылатынын атап өтіп, тиісті бағдарламаларды одан әрі дамытуды тапсырған болатын. Сонымен қатар, Мемлекет бас­шы­сы тұрғын үй құрылысын дамы­ту мәселесіне баса көңіл бөліп, Үкі­метке бірыңғай «Нұрлы жер» тұр­ғын үй құрылысы бағдар­лама­сын әзірлеуге тапсырма берді. Одан бері Үкімет біршама жұмыс­тар атқарды. 23 желтоқсанда өт­кен Үкімет мәжілісінде осы бағдар­ламалар талқыланды. Бүгін біз осы бағдарламалардың мәні, мағына­сы туралы жан-жақты ақпарат алу үшін және оны сайлаушылармен кез­десу барысында түсіндіру жұмы­сы­на пайдалану үшін тиісті министр­­лік­тер­дің өкілдерін шақырып отырмыз», – деді Мәжіліс Төрағасы­ның орынбасары Г.Исімбаева өзі­нің сөзінде. Елбасы тапсырмасы­на сәйкес Денсаулық сақтау және әлеуметтік даму, Ұлттық экономика, Білім және ғылым, Ауыл шаруашылығы министрліктері «Атамекен» палатасымен бірлесе отырып, нәтижелі жұмыспен қамту және жаппай кәсіпкерлікті дамыту бағдарламасын даярлаған. Бұл бағдарлама Үкімет отырысында қабылданды. Фракция отырысында Денсаулық сақтау және әлеуметтік даму министрінің орынбасары Біржан Нұрымбетов аталған бағдарламаны жақында өңірлерге шығатын Мәжіліс депутаттарына таратып айтып берді. Вице-министрдің баян­­дауын­ша, жаңа бағдарлама­ның негізгі мақсаты – халықты нәти­желі жұ­мыспен қамту. Бұл мақсат келесі үш бағыт бойынша жүзеге асатын болады: біріншіден, қа­жет­ті мамандықтар және кәсіпкерлік мамандықтар бойынша жаппай оқыту; екіншіден, кәсіпкерлік­тің дамуына жаппай жағдай жа­сау; үшіншіден, еңбек нарығын дамыту. Бағдарлама келесі топтарды қамтиды – жастары 15-45 ара­лығында, айлық табысы 60 мың теңгеден аспайтын өзін өзі қамтыған, жұмыссыз жүрген және кәсіби мамандығы жоқ бас­қа да азаматтар. Осы топтарға 550 мың адам кіреді, олардың 84%-ы ауыл­дық жерде тұрады. Бағ­дар­­­ла­маның негізгі ерекшелігі – қажет мамандықтар бойынша жап­пай оқыту ұйымдастырып, аза­мат­тарымыздың өз беті­мен жұмыс табуына немесе өз ісін ашуы­на көмектесу. Баянда­машы жаңа бағдарламаның қазіргі «Жұ­мыспен қамтудың жол картасы» бағдарламасынан айырмашы­­лы­ғы «біз азаматтарымызды жұ­мыс беру­шілердің тапсырыстары бо­йынша оқытып алып, содан соң оқып алғандарды сол жұмыс берушілердің жұмысқа орна­лас­­тыруын көздедік. Ал азамат­тары­мыздың жұмысқа сәтті орналасуына оқыту арқылы олардың нарықта қажетті мамандық пен шеберлік алғандары себеп болады деп есептейміз», – деді. Бағдарламаның үшінші бағыты бойынша «Жұмыспен қамтудың жол картасы» арқылы іске асатын жастарды, әйелдерді, мүмкіндігі шектеулі азаматтарды жұмысқа орналастыру, әлеуметтік жұмыс орындарын құру, жастар практикасын ұйымдастыру сияқты іс­-әрекеттер атқарылатын болады. Азаматтарды жұмысқа орналас­тыруға жәрдемдесу «Жұмыспен қамтудың жол картасы» арқылы жүзе­ге асатын болады. Қажет бол­ған жағдайда үміткерлер бағдар­ламаның бірінші бағыты бойынша оқытуға жіберіледі. Вице-министр «Бағдарлама аясында еңбек ресурстары артық өңірлерден Үкімет белгілеген өңірлерге қоныс аудару да жүзеге асады. Көшетін өңірлер ретінде Алматы, Жамбыл, Маңғыстау, Оңтүстік Қазақстан облыстары бел­гіленген. Баратын өңірлер Шығыс Қазақстан, Солтүстік Қазақ­стан, Қостанай, Павлодар облыстары. Қоныс аударатындарға мемле­кет тарапынан жол қаражатын жаба­­тын субсидия төленеді. Осы бағдар­ла­ма барысында азаматтарға жұмыс табу үшін, ал жұмыс беруші­лер­ге жұмыскерлер тауып беру үшін Бірыңғай электронды еңбек бир­­жасы құрылады. Бұл жүйеге мемлекеттік органдардың ақпа­рат жүйелері, жеке жұмысқа орна­лас­тыру агенттіктерінің мәлімет­т­ер базасы және барлық жұмыс­пен қамту орталықтары қосылатын болады. Бағдарлама 94 мың адамды қамтып, осы мақсатқа 25 млрд теңге бөлінетіні күтілуде. Жаңа бағдарлама арқылы 500 мыңдай жаңа жұмыс орындары ашылып, өзін өзі қамтығандардың табыстары 36%-ға ұлғайып, ал ішкі жалпы өнім 0,8%-ға өседі деген үміт бар» – деді. Отырыста қаралған екін­ші мә­селе – «Нұрлы жер» тұр­ғын үй құ­ры­­лысын салу бағдар­ла­ма­сы туралы Ұлттық экономика министрі­нің орынбасары Айдар Арифханов баяндап бер­ді. Министрліктің құры­лыс ісі, тұрғын үй-коммуналдық шаруа­шылық және жер ресурс­тарын басқару комитетінің төр­аға­сы Мар­хабат Жайымбетов депу­тат­тар­дың сұрақтарына жауап бер­ді. Екі тақырып та фракция мүше­лері ара­сында қызу талқыланып, оған О.Өк­сікбаев, Ш.Өтемісов, Н.Са­бильянов, Г.Қарағұсова, М.Қаз­бекова, Б.Хаменова, Б.Смағұл, К.Абсатиров, М.Ерман, т.б. депутаттар белсене қатысты. Жақсыбай САМРАТ, «Егемен Қазақстан»