Биыл Астана кәсіпорындары 368 млрд теңгенің өнімін шығарды

2016 жылдың 11 айында елорданың өнеркәсіп кәсіпорындары 368,2 млрд теңгенің өнімін шығарды, өсім көлемі 2,1%, деп хабарлады astana.gov.kz. Қала экономикасына 712,9 млрд теңге инвестицияланды, бұл өткен жылғы көрсеткіштен 1,5%-ға жоғары. Қалалық экономика және бюджеттік жоспарлау басқармасы басшысының орынбасары Айжан Түгелбаева қалалық мәслихаттың тұрақты комиссияларының бірлескен отырысында осындай мәліметтер келтірді. Өңірлік жалпы өнімнің көлемі бойынша Астана республикада Атырау облысынан кейінгі екінші орында тұр. Осы жылдың бірінші жартыжылдығының қорытындысы бойынша, ол 2 148,8 млрд теңгені құрады. Бұл өткен жылдың сәйкес кезеңіндегіден 2,9%-ға көп. А. Түгелбаеваның айтуынша, биылғы жылдың қаңтар-қараша айларында елордада 17,3 мың жаңа жұмыс орны құрылған. Бұл 2016 жылдың ІІІ тоқсанының қорытындысы бойынша жұмыссыздық деңгейін 4,6%-ға дейін төмендетуге мүмкіндік берді. Бюджеттік жоспарлау басқармасы басшысының орынбасары жекелеген әлеуметтік-экономикалық индикаторлар бойынша жоспарлық көрсеткіштер ағымдағы жағдайды талдау нәтижелерін ескере отырып өзгертілгенін атап көрсетті.