Желтоқсан туралы жаңа жинақ

Желтоқсан оқиғасының тарихи мәні мен халықаралық сая­си маңызы Астанада, қа­зан айының аяғында болған ғылыми-практикалық конференцияда жоғары деңгейде сарапталған болатын. Оның жұмысына отан­дық ғалымдар мен саясаткерлерден басқа жиырмадан астам елдерден келген сарапшылар мен мамандар, бұрынғы мемлекеттік басшы қызметте болғандар және ғылыми-зерт­теу ұйымдарынан келгендер қатысты. Міне, осы халықаралық ғы­лыми-практикалық конференцияда сөйленген барлық сөз­дер мен айтылған ойлар ұйым­дастырушылардың ерен еңбек­терінің арқасында Ас­тана қалалық ішкі саясат де­партаментінің қолдауымен «Қазақ­стандағы Желтоқсан (1986) көтерілісінің тарихи және халықаралық маңызы» деген атпен жуырда 500 беттік же­ке жинақ болып шықты. Өт­кен жұма күні Л.Н.Гумилев атындағы Еуразия ұлттық уни­верситетінде осы кітаптың тұсау­кесер рәсімі болды. Шараны осы университеттің профессоры Зиябек Қабылдинов ашып, жүргізіп отырды. Сүйекті басылым бір мың даналық тиражбен шыққан. Шығып сөйлегендердің бәрі де осын­шалық құнды еңбек­тің жарық көруін ұйым­дастырғандарға шынайы алғыс­тарын айтты. Енді оны ағылшын тіліне аудару мәселесі алда тұр. Сонымен қатар, «Желтоқсан» атты сайт ашу міндеті де күн тәртібіне енгізілген. Конференцияға қа­ты­сушылар 9-сыныптың тарих оқулығындағы Желтоқсан көтерілісі туралы материалдың шағын ғана екенін ескеріп, Білім және ғылым министрлігіне оны арнайы параграф қылып енгізу туралы ұсыныс жасаған. Сондай-ақ, жыл сайын «Желтоқсан оқулары» өткізіліп тұруы қажеттігі де ай­тылған. Зиябек Қабылдинов өз сөзінде Желтоқсан көтерілісінің 30 жылдығына арналған шаралар туралы да жиналғандарды хабардар етті. Соның ішінде Астана қала­сының әкімі Әсет Исекешев желтоқсандықтармен кездесу өткізіп, оларға мерекелік медальдар тапсырғаны, Алматыда болған шаралар қала әкімі Бауыр­жан Байбектің қатысуымен өткені, ал Ақтөбе қаласында Қайрат Рысқұлбековке ескерткіш ашыл­ғаны айтылды. Сөйтіп, ХХ ғасыр­дың аяғында қазақ санасын дүр сілкінткен оқиғаның екінші өмірі жаңа қырға шығып, қарышты қадамға басқандай болды. Жақсыбай САМРАТ, «Егемен Қазақстан»