Абайлаңыз, отшашу!

Бүгінде Жаңа жыл мерекесінің басты дайындығы көздің жауын алғандай етіп шырша безендіру мен кең дастарқанды жайнатып қою ғана емес, отшашудың алуан түрін молынан сатып алуға деген ұмтылысқа ұласып кетті. Жаңажылдық түнгі аспандағы «отшашу бәйгесіне» атсалысуға әсіресе, бала атаулының әуес келетінін ескерсек, әлбетте, ең алдымен қауіпсіздік жағын естен шығармауға тиіспіз. Алматы Төтенше жағ­дай­лар департаментінің қызмет­керлері жергілікті полиция қызмет­керле­рімен бірге қаладағы сапасыз пиротехника өнімдерін анықтау мақсатында, заңсыз өнімдерді сататын орындарға тексеру жұмыс­тарын жүргізуге кірісті. ТЖД инженерлік-инспе­тор­лық құрамы тарапынан жыл сайы­н мереке қарсаңында қатаң жүргізілетін тексерулердің ар­қасында, заңсыз жолмен сатылатын пиротехникалық өнімдерді сатудың уақыт өткен сайын азайы­п келе жатқан­дығын айта кету керек. Кәсіпкер­лер де кейінгі жылдары отшашу бұйымдарын заңсыз сатуға сақтықпен қарап, сертифи­катталған өнімдермен саудасын қыздыруға бет бұра бас­тады. Тұтынушылардың өздері де жеке бас қауіпсіздігіне көбірек көңіл бөлетін болғандықтан, жаңажылдық отшашуларды тек арнайы дүкендерде сатып алуға ұмтылатын болды. Солай десек те, түрлі-түсті отшашу, шулы шартылдақ сияқты өнімдерді пайдалануда қауіпсіздік ережелерін сақтаудың маңыздылығына мән берген ТЖД қызметкерлері пайдаланар алдында пиротехникалық бұйымның қолдану нұсқаулығын мұқият оқып шығуға, өнімдерді қолдануға қатысты шектеулерді қатаң сақтай отырып, тұтатар алдында қауіпсіз алаң таңдап алуға, отшашудың жарамдылық мерзімі мен дайындалған уақытына айрықша көңіл бөлуге, қолдану тәсілі жөніндегі мәтіннің қазақ және орыс тілдерінде анық әрі айқын қаріптермен түсіндірілгеніне мән беруге кеңес береді. Осындай қарапайым қауіп­сіздік ережелерін сақтағанда ғана отшашудан тараған жұлдызды өрнектер сұлулығын тамашалап қана қоймай, мерекелік көңіл күй мен қуанышқа да кірбің түспейтінін ұмытпаған абзал дей­ді мамандар. Мира БАЙБЕК, «Егемен Қазақстан» АЛМАТЫ