Павлодар эстафетаны өткізуге әзір

Павлодар 2017 жылы Алматыда өтетін Бүкіләлемдік қысқы Универсиаданың аймақтық алау эстафетасын өткізуге дайын. Бүгінде бағыттар белгіленіп, алауды қала көшелерімен алып жүретін адамдар анықталды. – Универсиада – ел мерейін өсіретін ірі жарыс. Сондықтан оны барынша насихаттау керек. Алау эстафетасына қатысатыныма қуаныштымын. Бұл менің өмірімдегі жарқын сәттердің бірі, – дейді Универсиаданың аймақтық алау эстафетасына қатысатын спорт ардагері, Павлодар қаласының Құрметті азаматы Амангелді Аймағамбетов. Облыстық дене шынықтыру және спорт басқар­масының бас маманы Айбек Ақылжановтың айтуынша, аймақтық эстафета алауы 26 қаңтарда С.Торайғыров атындағы Павлодар мемлекеттік университетінде жағылады. Алау Ломов-Сәтбаев-Кривенко-Ленин көшелері арқылы Естай атындағы мәдениет сарайына жеткізіледі. Мұнда кішігірім техникалық үзіліс орын алады. Одан кейін алау ұстаушылар «Сарыарқа» қонақ үйінің жанымен Торайғыров көшесіне түседі. Сөйтіп, Торайғыров-Кутузов-Кривенко көшелері арқылы «Астана» мұз сарайына жеткізіледі. Мұнда Универсиаданың құрметіне жергілікті және Қазақстан өнер жұлдыз­дары­ның қатысуымен гала-концерт өтпек. Шара аяқталған соң, алау ұшақ арқылы жаһандық жарыс өтетін Алматыға жөнелтіледі. – Универсиаданың алау эстафетасына Павлодар облысынан 60 адам қатысады. Олардың қатарында студенттер, спортшылар, спорт ардагерлері бар. Эстафетаның жалпы ұзақтығы 10-12 шақырымды құрайды. Әрбір қатысушы 200 метрден жүгіріп өтеді, – дейді А.Ақылжанов. Универсиаданың ресми сайты хабарлағандай, алау эстафетасы еліміздің 16 қаласында өткізіледі. Ең ұзақ эстафета Алматы қаласында тіркелмек. Мұндағы эстафетаның ұзақтығы 20 шақырымды құрайды. Жалпы, Универсиада алауы 22 500 шақы­рымдық қашықтықты бағындырады. Фархат ӘМІРЕНОВ ПАВЛОДАР