Дэн Эмброуз: Альварес Головкинмен тезірек жекпе-жек өткізуі тиіс

Boxingnews24.com порталының шолушысы Дэн Эмброуз америкалық кіші Флойд Мейвезердің жақында берген сұхбатына қатысты өз пікірін білдірді. Бұл туралы vesti.kz хабарлады. Америкалық боксшы мексикалық Сауль Альварес (48-1-1, 34 КО) қазақстандық Геннадий Головкинмен (36-0, 33 КО) жұдырықтасар болса, уақытынан бұрын нокаутпен жеңетініне сенімді екенін айтқан. Сондай-ақ, жекпе-жектің қазір өтуі тиімсіз әрі қаржы мәселесін жоспарлы түрде жүзеге асырған жөн екенін ескерткен. «Кейбір жанкүйерлер Мейвезердің сөзін желеу етіп, «Канелоның» Головкинмен күш сынасудан бас тартуы дұрыс деп есептейді. Ал менің ойымша, Альварес бұл кездесуден жалтарып жүр. GGG ашық түрде жұдырықтасқысы келетінін мәлімдегенмен, мексикалықтан әлі күнге дейін мардымды жауап бола қоймады», – деді шолушы. «Golden Boy әлі уақыты келмегенін айтады. Бірақ ол күн қашан келеді? Головкин бірнеше айдан кейін 35-ке келеді. Тиісінше, оның спорттағы жасы да келіп қалды. Бірақ әлі де жоғары деңгейде өнер көрсетіп жүр. Кейбіреулер Келл Брукпен өткен ұрысында олқылықтары көрініп қалғанын айтады. Головкиннің бірнеше жойқын соққы жіберіп алғаны рас. Бірақ британиялықтың көзін шығара жаздап, уақытынан бұрын жеңгенін ұмыт қалдырып жатады. Ол күні мәселе күшінде емес қорғанысында болғанын ескерген жөн», – деді Дэн Эмброуз. «Мейвезердің айтуы бойынша, Альвареске ол лайықты қарсылас емес екен. Олай болса, кездесу әлдеқашан бұрын өтуі тиіс еді. «Канело» мен Golden Boy бұл істі кейінге қалдырғаны фанаттарды Головкиннен қашып жүргендей сезімде қалдырып жатады. Бәлкім Головкиннің қартайғанын күтіп жүрген болар?! Флойдтың сөзін растау үшін қос спортшының арасындағы бокс кешін тезірек көруіміз керек», – деді Эмброуз. Айта кетейік, бұл іс 2016 жылы өтуі тиіс болатын. Бірақ мамыр айында мексикалық бас тартқандықтан орта салмақтағы оның WBC белбеуі Геннадийге берілді. Сонымен қатар, Альварестің Головкинмен жекпе-жегін биылға жоспарлағаны да хабарланған. Қос тарап қаржы мәселесінде ортақ келісімге келе алмағандықтан қазір келіссөздер тоқтап тұр.