Дәрігерлерге арналған дәріс

Парламент Мәжілісінің депутаттары елордадағы Ұлттық ғылыми кардиологиялық орталықта «Нұр Отан» партиясы қалалық «Өркениет» филиалының медициналық қызметкерлерімен кездесті.   Мәжіліс депутаттары Гүлжан Қара­­­­ғұсова мен Татьяна Яковлева кез­десу барысында Президенттің билік тар­мақ­тары арасындағы өкілеттіктерді қайта бөлу жөніндегі Үндеуінің және «Қазақстанның Үшінші жаңғыруы: жаһандық бәсекеге қабілеттілік» Жол­дауы­ның мән-маңызын түсіндірді. Сондай-ақ, осы жиында «Нұрлы жер» тұрғын үй құрылысы бағдарламасының жобасы талқыланды. Г.Қарағұсова өз сөзінде елімі­здің басқару жүйесі елеулі өзгерістерге бағыт алғанын атап өтті. «Басқару өкілеттіктерінің бір бөлігін Парла­мент пен Үкіметке берудің арқасын­да билік тармақтарының өзара іс-қимылының жаңа үлгісі пайда бола­ды. Мәселе осы туралы болып отыр. Парламент пен Үкіметтің қоғам ал­дын­дағы жауапкершілігін арттыру жұмыс сапасына да оң ықпал етеді. Мәселен, бұрын осыған дейін Үкімет бағдарламаны әзірлеп, оны Президент бекітетін. Енді бағдарламалар­дың орындалу жауапкершілігі, бөлінген қаражаттардың игерілуі, барлығы Үкіметтің жауапкершілігіне өтеді», – деді депутат. Т.Яковлева медицина қызмет­кер­леріне «Нұрлы жер» тұрғын үй құрылысы бағдарламасы жобасының жай-жапсары туралы баяндап берді. Оның айтуынша, бағдарламада баспа­наның қолжетімділігін арттырудың, құрылыс компанияларын тұрғын үй салуға ынталандырудың жолдары қарас­тырылған. Депутаттың сөзін Ұлттық эконо­мика министрлігі Құрылыс және тұр­ғын үй-коммуналдық шаруашылық іс­тері комитеті төрағасының орын­ба­сары Бақытжан Качаков толықтыр­ды. «Құрылыс жұмыстарын бастамас бұрын  қай өңірде қанша үй салу керек, оның бағасы қай шамада болуға тиіс деген мәселелерді жоспарлап алған жөн. Қандай категориядағы азамат­тар баспанаға өте зәру? Оны да анық­тап алмақпыз. Тұрғын үй нарығы­на талдау жасай отырып, өңірлер­дегі баспанаға деген сұраныс деңгейі­не көз жеткізу қажет. Осы сауалдар­дың бәріне әлеуметтік сауалдама жүргізу арқылы жауап алатын боламыз», – деді Б.Качаков. Талқылау барысында Мәжіліс депутаттары, «Нұрлы жер» бағдарла­масының жобасын әзірлеуге қатыс­қан құзырлы орган өкілдері кездесуге келген адамдардың сұрақтарына ег­жей-тегжейлі жауап берді. Айта кетейік, «Нұр Отан» партия­сының қалалық «Өркениет» филиалы Пре­зиденттің билік тармақтары ара­сында өкілеттіктерді қайта бөлу мәсе­лелері жөніндегі Үндеуін, сонымен қатар, Мемлекет басшысының халыққа ар­наған Жолдауын елордадағы меди­циналық еңбек ұжымдарына түсін­діру жұмыстарын жалғастыра беретін болды. Арнұр АСҚАР, «Егемен Қазақстан» АСТАНА