Әр Жолдаудың өз жаңалығы бар

Президенттің «Қазақстанның Үшінші жаңғыруы: жаһандық бәсекеге қабілеттілік» атты кезекті Жолдауының басым бағыттарын түсіндіру және насихаттау мақсатында Парламент Мәжілісінің депутаттары Гүлмира Исімбаева мен Әбдіманап Бектұрғанов және «Нұр Отан» партиясы Алматы қалалық филиалы төрағасының бірінші орынбасары Жұлдыз Омарбекова Абай атындағы ұлттық педагогикалық университеттің оқытушылық-профессорлар құрамымен, студенттермен кездесті.  Еңбек жолы мен қызмет лауазымы білім саласымен бірге өрілген депутаттардың қарашаңырақ оқу ордасына ат басын бұру мақсаты – егемен елдің тұрақты дамуын қамтитын, мемлекеттің барлық саласына серпін беретін, постиндустриялық қоғамды қалыптастыратын өнеркәсіптік-инновациялық даму бағдарламасының сая­са­тын ұсынатын, жаңа тех­нологиялық-иннова­ция­лық да­муды қолдайтын тарихи құжат жайлы толық әрі терең түсініктеме беріп, мазмұны мен маңызын ұжыммен бірге талқылау. Елбасының стратегиялық жоспарларының алға ба­суы­ның нәтижесінде екі қадам­ды артқа тастап, үшінші жаң­ғыруға қадам басты. Мем­лекет басшысы мән беріп отырған басымдықтар мен ба­ғыт­тардың әрқайсысы халық үшін маңызды. Ә.Бектұрғанов негізгі бес басым­дықтың әрқайсына жеке тоқ­тала тұрып, Жолдаудағы білім, тіл, тех­нологиялық даму мәселе­леріне қатысты ой-пікірін тарата айтты. Ғылым мен техниканың дамыған заманында елімізде өнеркәсіптің революциялық элементтерін енгізу қажет. Осыған орай жаңа инновациялық стартаптарды меңгеру, ғылыми-техникалық әлеуетті дамыту, технологияның соңғы жаңалықтарынан хабардар болып, оған қол арту – Қазақстан жастары үшін арман емес, күнделікті өмірде үйренуге, талпынуға тиіс қажеттілігі болуы керек. Депутаттар баланы  алты жасынан мектепке беру, он екі жылдық білім жүйесі, үштілділік мәселесіне орай қойылған сауалдарға нақты жауап беріп, түйіні әлі толық табылмаған түйткілді жайттармен сәт сайын бетпе-бет келіп, тығырыққа тіреліп жүрген ұстаздардың ұсы­нысын тыңдады. «Елбасы 1997 жылы жасаған алғашқы Жолдауынан кейін Қазақстан халқына арнап 21 рет Жолдау жасады. Әр Жолдаудың мәні де, орны да бөлек, ешқашан бірі екіншісін қайталаған емес, әр Жолдаудың өз жаңалығы бар. Жолдауда білім, оның ішінде жастарға кәсіптік-техникалық білім беру, осы салада мамандар даяр­лау, ауыл мен қала мектеп­терін теңестіру, жаңа мек­тептер салу – өте маңызды жұмыс. Бұған білім саласы­ның қызметкерлерін өте жауап­кершілікпен қарауға шақы­рамын. Жолдаудың түпкі мәні халық қамы болған­дықтан, білім беру, денсау­лық сақтау, ауыл шаруа­шылығы саласы бойынша ай­тылған бағыттар мен ілгері­ректе қабылданған ілкімді бағ­дарламалар бойынша істе­летін жұмыс бір сәтке тоқ­тамауы керек», – деді Гүлмира Исімбаева. Депутаттар билік құры­лы­мындағы өкілеттік бөлу мәселесіне орай туын­даған конституциялық өзге­ріске байланысты да дәйек­ті түсініктеме жасады. Жа­һандану үрдісінен қалыспай, заманауи игіліктерді өз бойына біріктіріп, қоғаммен ұштастыра алатын жастарды жаңа тұрпатты кезеңге сай білім беріп, тәрбиелеу ұстаздар алдындағы ұлы жауапкершілік екенін еске салып, Жолдаудан туындайтын міндеттерді жүзеге асыруға бар күш-жігерді жұмылдырып, бірге атқаруға шақырды. Айгүл АХАНБАЙҚЫЗЫ, «Егемен Қазақстан» АЛМАТЫ