Қарғын суға қарсы қамсыз болмайық

Былтыр көктемде сай-са­ланы қуалай аққан қызыл су бірқатар ауылдар мен облыс ор­та­лығындағы шағын ау­дан­­дарды шайып кетіп, тұр­ғын­дарды әлекке сал­ғаны бар. Би­ыл мұндай қауіпті барынша азайтудың, болдырмаудың жолдары алдын ала қарастырылып, сақтық шаралары күшейтіліп отыр. Синоптиктердің болжамына қарағанда, қардың шамадан тыс жаууы салдарынан көктемгі су тасқыны тағы да ырық бермей кетуі мүмкін. Бүгінде бірнеше жедел топтың құрамына енген тәртіп сақшылары мен тұрғын үй ком­муналдық-шаруашылық ме­кемесінің қызметкерлері жолдар мен көшелердің жағ­дайына мониторинг жүр­гізумен шектелмей бақылау рейдтерін де ұйымдастырып отырады. Кезекті тексерулер барысында аулаларды, мекеме жандарын үйінді қардан тазаламаған басшыларды «қара тізімге» енгізіп, ықпал ету шаралары қолданылды. Ескертулерге құлақ аспаған «тентектер» мен «ақпа құлақтар» қалталарынан қағылуға тура келді. Алты кәсіп­орынға 136 мың теңге айыппұл салынып, тәубелеріне келтірді. – Қатарымызға пәтер иеле­рі кооператив мүшелерін де тартып отырмыз. Бірлесе жұ­мыс істеудің арқасында 300-ге жуық мекеме-ұйымға хабарлама таратылды. 235 хаттама толтырылды. Ал қар тазалау жұмыстары сапасыз атқарылса, ешкім де әкімшілік жауапкершіліктен құтылмайды. Қатаң талапты босаңсытуға болмайды. Тұрғындар көктемде қарғын судың зардабын тартпас үшін барлық күш-жігерді жұмылдырудамыз,– дейді қалалық жергілікті полиция бөлімі бастығының орынбасары Шәмшиден Ақышев. Өмір ЕСҚАЛИ, «Егемен Қазақстан» ПЕТРОПАВЛ